Унгарија најави дека ќе се повлече од Меѓународниот кривичен суд (МКС) во Хаг.
Процесот на повлекување ќе започне денес и ќе се изведе во согласност со уставната и меѓународната правна рамка, соопшти шефот на кабинетот на унгарскиот премиер, Гергељ Гуљаш.
Оваа одлука беше објавена за време на посетата на израелскиот премиер, Бенјамин Нетанјаху, кој се наоѓа во Унгарија. Посетата на Нетанјаху е прва на европска територија по издавањето на налогот за негово апсење од страна на МКС во мај 2024 година. Судот соопшти дека има „разумна основа“ да верува дека Нетанјаху е одговорен за воени злосторства, меѓу кои и „гладување како метод на војување“ и „злосторства против човештвото“.
МКС нема своја полиција за апсење, па се потпира на земјите-членки за апсење и префрлање на осомничените во Хаг. Како потписник на Римскиот статус, Унгарија е обврзана да го уапси Нетанјаху, но со повлекувањето од судот, земјата повеќе нема да биде обврзана да го спроведува налогот.
Доколку Унгарија го реализира повлекувањето, таа ќе стане единствената земја од Европската унија која не е членка на МКС. Израел не е член на судот, како и САД, Кина, Русија, Саудиска Арабија и други земји.
