Украинската полиција соопшти дека руски разузнавачи регрутираат украинска младина за терористички и саботажни активности.

Како што пренесе украинската агенција Укринформ, Службата за безбедност на Украина (СБУ) уапсила дечко и девојка на возраст од 18 и 19 години, кои, по наредба на Русите, планирале на 25. март да активираат импровизирана експлозивна направа пред воената единица во Запорожје.

Еден таков разговор беше објавен на Фејсбук од заменикот на началникот на Одделението за патролна полиција, Олексиј Билошицки, кој сподели снимка од електронската комуникација меѓу ученик од Одеса и рускиот регрутер.

„Постојаното подигнување на свеста меѓу учениците за опасностите кои се кријат на интернет дава резултати. Пред некое време, еден ученик од деветто одделение се обратил на инспекторот на Службата за безбедност на образованието во Одеса. Тој рекол дека со регрутерите се контактирало преку канал на Телеграм, нудејќи им додатни пари. Задачата била да запали возила на воените канцеларии за регрутирање и административни згради и да остави графити на нив, сѐ за парична награда“, истакна Билошицки.

Според неговите зборови, оператерите најпрво им нудат едноставни задачи, како фотографирање на одредени предмети или цртање графити на ѕид. Ако детето се согласи, тие се обидуваат да го вовлечат во посериозни субверзивни активности – преку уцени или ветување лесна заработка.

„Во овој случај, сѐ заврши добро: ученикот го зачува разговорот на својот телефон и го предаде на инспекторот на Службата за безбедност на образованието. Надлежните служби се веќе информирани и го истражуваат случајот. Пријатели, бидете внимателни и објаснете им на децата какви ризици носат ваквите ‘понуди’. Не молчете“, апелираше Билошицки.

Прво графит, па потоа сериозни задачи

На првата снимка од екранот на разговорот се гледа украински ученик го поздравува рускиот регрутер, кој потоа му испраќа медиумски материјал поврзан со саботажа. Дечкото му поставува прашање: „Какви гаранции имате дека ќе ја исплатите целата сума?“

Рускиот регрутер му одговара: „Ако сакаш, можеме да почнеме со нешто мало.“

„Со што точно?“ прашува дечкото.

„Графитите се најлесни“, одговара рускиот регрутер.

Дечкото потоа го замолува да објасни подетално и поставува неколку прашања: „Што точно, каде и како треба да се направи? И како ги извршувате и проверувате задачите?“

Рускиот регрутер му испраќа слика од цртеж на хартија.

„Цртеж метар на метар. Краток видео-извештај преку апликација“, вели рускиот регрутер.

„Добро, разбрав. Само да нацртам и да пратам?“ прашува ученикот.

„Да, нацртај таков цртеж како на хартијата што ти ја покажав. Потоа на снимката го покажуваш самиот цртежот и малку од околината. Преку апликација“, одговара рускиот регрутер.

Ученикот го прашува дали за тоа постои кривична одговорност.

„Постои одговорност за било каков цртеж на ѕидовите, зарем не знаевте?“ пишува рускиот регрутер.

Во продолжението на разговорот, рускиот регрутер и украинскиот ученик разговараат за сумата што ќе ја добие за саботажата.

Во првата порака, Украинецот наведува дека никогаш не цртал графити на ѕидови, но е подготвен да го направи тоа.

Потоа му поставува прашање на рускиот регрутер: „Три долари, дали добро разбирам?“ Рускиот регрутер му испраќа искрен одговор и му вели да ја преземе апликацијата и да тестира како функционира. Тој додава дека фотографијата испратена на апликацијата за саботажа треба да ја прикажува градот и улицата.

Рускиот регрутер потоа му испраќа фотографија од графит на ѕид.

„Таков цртеж чини 3 долари“, додава тој.

Украинецот го прашува како да ја изврши задачата и каде е препорачливо да постави графити, на што регрутерот одговара дека цртежите треба да бидат на фреквентни места.