Русија изврши напад со беспилотни летала во текот на ноќта, при што се повредени четири лица, а предизвикана е сериозна штета на станови и деловни објекти во Киев и други делови на Украина, соопштија денеска украинските власти.

Според украинските воздухопловни сили, противвоздушната одбрана соборила 56 од 88-те лансирани руски беспилотни летала, објави Ројтерс.

Исто така, воени извори наведуваат дека се „изгубени“ 24 дронови.

Градоначалникот на Киев Виталиј Кличко потврди дека три лица се повредени во Киев поради напади со дронови.

Отпадоци од дрон уништија приватна куќа и оштетија неколку комерцијални објекти, предизвикувајќи големи пожари на различни локации во Киев, соопштија градските власти.

Уште едно лице е повредено во Харков во североисточна Украина, изјави градоначалникот на Харков, Ихор Терехов.

Регионалните власти, исто така, пријавија штета на станбени и комерцијални објекти во централниот регион Дњепропетровск, додека војската пријави штета во регионот Одеса на југот на земјата.

Генералниот секретар на НАТО Марк Руте изјави дека Алијансата има информации дека Русија ја разгледува можноста за поставување нуклеарно оружје во вселената, што може „сериозно да ја загрози глобалната безбедност“, објави германскиот весник „Велт“.

„Свесни сме за извештаите дека Русија ја испитува оваа опција“, изјави Руте за весникот, додавајќи дека Москва заостанува зад Западот во вселената и дека се обидува да го достигне развојот на нуклеарно антисателитско оружје.

Според него, таквото оружје не би било насочено директно кон Земјата, туку кон сателити, чие уништување може да предизвика „хаос“, бидејќи многу клучни системи на планетата се потпираат на сателитската технологија.

Специјалниот пратеник на САД за Украина и Русија објасни дека САД нема да испрати копнени трупи, но предложи формирање демилитаризирана зона широка 28 километри долж постојните контролни линии во источна Украина. 

Специјалниот пратеник на САД за Украина и Русија, Кит Келог, изјави дека Украина може да биде поделена „речиси како Берлин по Втората светска војна“, како дел од мировниот договор.

Келог предложи британските и француските војници да ги преземат контролните зони на западот на Украина, додека руската армија да остане на истокот на земјата, а меѓу тие зони да бидат украинските сили и демилитаризирана зона, пишува „Тајмс“.

Келог, кој има 80 години, рече дека англо-француските сили на западната страна на реката Дњепар, која ја дели Украина од север кон југ и тече низ Киев, нема да дејствуваат како „провокација“ за Москва.

Тој додаде дека Украина е доволно голема за да дозволи присуство на неколку воени армии кои би го координирале прекинот на огнот.

– Тоа речиси би можело да изгледа како Берлин по Втората светска војна, кога имаше руски, француски, британски и американски сектор. Дњепар е голема пречка“, додаде Келог, објаснувајќи дека Америка нема да испрати копнени трупи, но предложи формирање демилитаризирана зона широка 28 километри долж постојните контролни линии во источна Украина.

Планот на Келог подразбира имплицитно признавање на „де факто контролата на Русија“ над териториите што таа моментално ги окупира.

Тој призна дека рускиот претседател Владимир Путин можеби нема да ја прифати предложената поделба на зони на контрола, но ја нагласи потребата да се воспостави тампон зона меѓу украинските и руските линии за да се спречат инциденти.

Тој, исто така, рече дека Украина треба да одржи нови избори откако ќе се постигне прекин на огнот.

Тој оцени дека претседателот на Украина, Володимир Зеленски, е отворен за одржување избори, но дека тоа е одлука што ќе ја донесе украинскиот народ, а не САД.

Келог нагласи дека односите меѓу Вашингтон и Киев „се враќаат на вистинскиот пат“, истакнувајќи дека преговорите за евентуален договор за украинските минерали се обновени.