Битола по седум години повторно ќе биде домаќин на натпревар на македонската ракометна репрезентација. Денес, во рамките на баражот за пласман на Европското првенство, ќе се одигра натпреварот меѓу женските селекции на Македонија и Полска.

Секретарот на Општина Битола, Борче Димитровски, беше гостин во утринската програма на МТВ каде што го најави спектаклот што следува. Тој истакна дека овој натпревар е од особено значење, не само за репрезентацијата туку и за градот, кој повторно добива шанса да биде центар на македонскиот ракомет.

„За кого? За Македонија“, порача Димитровски со голема емоција, повикувајќи ги битолчани масовно да ја поддржат репрезентацијата и да го исполнат спортскиот центар.

Во присуство на министерот за спорт Борко Ристовски и градоначалникот на Тетово, Биљал Касами, денеска беа отворени новите спортски терени во рамки на ОСМУ „Никола Штејн“. Новиот спортски центар претставува значаен чекор напред во развојот на спортската инфраструктура во градот и пошироко.

Целта на проектот е јасна – да се создадат услови за спорт и рекреација на младите, како и да се поттикне здрав начин на живот и натпреварувачки дух.

Во рамките на новиот центар се изградени:

• фудбалско игралиште со вештачка трева,

• терен за одбојка со вештачка подлога,

• кошаркарско игралиште со полипропиленски под според ФИБА стандарди,

• трибина со капацитет од околу 300 седишта.

„Ова е уште еден доказ дека инвестираме со цел и визија. Продолжуваме да работиме посветено на современа и достапна спортска инфраструктура ширум целата држава,“ изјави министерот Ристовски.

Фудбалската федерација на Македонија (ФФМ) со гордост го најавува најновото партнерство со еден од најпрепознатливите домашни брендови – Витаминка Прилеп. Соработката претставува поврзување на нашиот фудбал со компанија која претставува составен дел од животите на неколку генерации. 

Витаминка ќе обезбеди финансиска поддршка за ФФМ за активности насочени пред се кон младинскиот фудбал и Детска лига. Визијата е заедничка: поддршка на младинскиот развој и здравиот начин на живот.

Производите на Витаминка, особено оние наменети за деца, ќе бидат дел од промотивните активности на ФФМ, со посебен фокус на ФФМ Детската лига – најголемата платформа за младински фудбал во државата, која инспирира илјадници деца да го следат својот спортски сон.

Масар Омерагиќ – претседател на ФФМ:

„Чест ни е да ја претставиме Витаминка како нов член на фудбалското семејство на ФФМ. Како компанија која има долгогодишна традиција и грижа за здравјето на децата, Витаминка е идеален партнер во нашата мисија за поттикнување на детскиот фудбал и поддршка за младинскиот спорт. Заедно ќе создаваме услови за здрав раст и спортски развој на идните генерации.“

Сашо Наумоски – генерален директор на Витаминка:

„Со голема радост се приклучуваме кон фудбалската приказна на Македонија. Преку поддршката на Детската лига, ќе бидеме уште поблиску до децата и ќе придонесеме кон нивната активна и здрава иднина. Ова партнерство ја отсликува нашата посветеност кон заедницата и спортот.“

Фудбалската федерација на Македонија и Витаминка започнуваат заедничка иницијатива која ќе ги инспирира најмладите генерации да растат здраво, активно и со спортски дух.

Добредојдовте, Витаминка – заедно градиме силна иднина!