Република

Шефот на мисијата на ОБСЕ, Килиан Вал, во посета на општина Битола

Градоначалникот на Битола, Тони Коњановски, денес оствари средба со шефот на мисијата на ОБСЕ, Килиан Вал, на која се разговараше за работата на локалната самоуправа и за реализацијата на инфраструктурни и социјални проекти во општината.

На состанокот беше истакната успешната соработка меѓу општина Битола и Мисијата на ОБСЕ во рамките на проектот „Зајакнување на дијалогот и соработката помеѓу полицијата и ромската заедница“. Преку овој проект, во изминатата година беа реализирани повеќе активности со цел унапредување на односите меѓу ромската заедница и полициските служби.

Коњановски се заблагодари за поддршката на ОБСЕ и нагласи дека инклузијата, дијалогот и соработката се темели врз кои се гради модерна и праведна општествена заедница.

Во рамките на иницијативата „НЕ за малолетнички бракови“, со поддршка на СВР-Битола и здружението „Сумнал“, активно се работи на подигнување на свеста за последиците од малолетничките бракови. Исто така, беа презентирани и активности насочени кон превенција од зависности и семејно насилство, како и чекори за десегрегација во основното образование.

Градоначалникот ја потврди определбата на општината за натамошно унапредување на соработката со сите заедници и институции, со цел создавање инклузивна, безбедна и просперитетна Битола.

Република

Утре две тетовски села ќе бидат без струја

Поради планирани технички зафати, утре (10 декември 2025) две села во тетовскиот регион ќе останат без електрична енергија во период од 09:00 до 14:00 часот.

Според најавата, прекин ќе има во делови од селото Џрпчиште, особено кај објектите што се наоѓаат во близина на млекарницата „Алпи“.

Исто така, без струја ќе бидат и делови од селото Теарце, поточно подрачјето во близина на полициската станица.

Од надлежните апелираат жителите да ги планираат своите активности согласно најавениот прекин.

Република

Јорданов со апел до граѓаните по вандализмот во центарот на Штип

Градоначалникот на Штип, Иван Јорданов, остро реагираше по серијата инциденти во централното градско подрачје, каде беа исечени новогодишни сијалици, уништени садници и оштетена урбана опрема. Тој оцени дека овие дејствија претставуваат сериозен удар врз заедничкото добро и вложувањата на општината.

„Сведоци сме на слики кои никој од нас не сака да ги види. Ваквите постапки не се само вандализам, туку ја нарушуваат сликата на градот и го поткопуваат трудот на сите кои работат за поуредено урбано окружување,“ истакна Јорданов.

Тој упати апел до СВР Штип да преземе мерки и санкции кон сторителите, потенцирајќи дека ваквото однесување ја загрозува безбедноста и ја понижува заедницата.

Јорданов ги повика и граѓаните на повисока свест и одговорност: „Нашиот град може да биде онаков каков што го посакуваме само ако секој од нас покаже грижа. Само заеднички можеме да го сочуваме јавниот простор и да создадеме средина во која сите се чувствуваме горди да живееме.“

„Нашиот град е наш дом и наша должност е да го чуваме,“ заклучи градоначалникот, охрабрувајќи ги жителите да реагираат доколку забележат уништување и да придонесат за заштита на градот.

Република

ЈП „Паркинзи“ го активира синџирот на пешачката зона во Битола

Битола, 9 декември 2025 – Јавното претпријатие „Паркинзи“ известува дека од утре повторно ќе се постави синџирот на улица „Рузвелтова“.

И покрај тоа што Советот на Општина Битола ја прогласи улицата за пешачка зона, несовесни возачи ја игнорираа сообраќајната сигнализација, што го направи неопходно повторното воведување на мерката за ограничување на сообраќајот.

ЈП „Паркинзи“ апелира до граѓаните да ги почитуваат правилата за да се овозможи безбедно движење на пешаците и одржување на редот на оваа прометна улица.