Советниците во Општина Центар на вчерашната седница на Советот, едногласно, со сите гласови „за“, ја усвоија предлог иницијативата на советникот Ненад Матевски, со која ќе се воведе чуварска служба во општината, која ќе води сметка за одржувањето на јавните добра и јавниот простор во Центар.

Советникот во Советот на Општина Центар, Ненад Матевски, до советниците на разгледување поднесе иницијатива за воведување на чуварска служба, со цел намалување и спречување на сѐ позачестените оштетувања на урбаната опрема, детските и спортски игралишта, дрворедите и урбаното зеленило.

„Оваа предлог-иницијатива произлегува од континуираната потреба за подобрување на квалитетот на животот и безбедноста на жителите на Општина Центар. Имајќи го предвид постоечкиот недостаток на доволен број полициски службеници и општински инспектори, сметам дека формирањето на една ваква мобилна служба, која ќе ги покрива сите 17 урбани заедници, ќе претставува значаен чекор напред во заштитата на јавното добро“, изјави во образложението на предлог-одлуката советникот Матевски.

Во одлуката претставен е и начинот на работа на чуварската служба, кој вклучува обуки на вработените од страна на стручни лица за овластувањата, начинот на постапување во различни ситуации, нивните комуникациски вештини и основните правни аспекти потребни за нивната работа. Службата ќе работи во тесна координација со МВР, ЈП ПОЦ и со општинските служби во насока на зголемување на степенот на безбедност на граѓаните на Општина Центар и заштита на јавните добра.

„Во Северна Македонија постојат примери на чуварски служби во рамките на одредени јавни претпријатија кои успешно придонесуваат кон заштита на јавното добро. На пример, Јавното претпријатие за стопанисување со државни шуми ‘Македонски шуми’, има организирана служба за надзор и заштита на шумските подрачја. Исто така, националните паркови како Маврово и Пелистер имаат служби за надзор и заштита на природните богатства. Дополнително, во некои општини, јавните комунални претпријатија имаат служби за обезбедување и надзор на нивните објекти и инфраструктура“, додава советникот Матевски во образложението.

Покрај заштитата на урбаната опрема, детските игралишта, клупите, кантите за отпадоци, спортските реквизити и останатата опрема, чуварската служба ќе води сметка и за зелените површини и општинското урбано зеленило, ќе биде мобилна и присутна на терен и доколку забележи активности спротивни на општинските насоки, ќе биде обврзана веднаш да го информира општинскиот инспекторат и МВР.

„Голема благодарност до сите советници и градоначалникот на Општина Центар за прифаќањето на мојата иницијатива за формирање на Чуварска служба! Ова е важен чекор за подобра заштита на нашето заедничко добро. За сигурен и безбеден Центар“, напиша Матевски во објава на социјалните мрежи, веднаш по вчерашното изгласување на одлуката.

Со рекордни 8,7 милиони евра планирани за 2025 година, Општина Чаир започнува амбициозен инфраструктурен бран што ќе ги опфати сите урбани сегменти и маала во општината. Градоначалникот Висар Ганиу денеска на прес-конференција ги презентираше проектите што ќе се реализираат во рамки на овој развоен циклус.

Модернизација на подземните мрежи, реконструкција на улици, изградба на нови детски градинки, подобрување на јавните услуги и оформување на јавни простори се дел од приоритетите во програмата. Ганиу потенцираше дека ова претставува најголем буџет за развој досега и дека целта е Чаир да добие современ урбан изглед со подобрени услови за живот за сите граѓани.

„Ова не се само планови на хартија. Дел од проектите веќе се реализираат на терен, со инвестиции вредни над 2,7 милиони евра во маалата Дижон, Саат Кула и Серава“, истакна градоначалникот.

Проектите се финансирани со директна поддршка од Владата преку наменски фондови за општините. Ганиу порача дека оваа поддршка е претворена во реална имплементација, со јасен фокус на одржлив урбан развој и подобрување на секојдневието на граѓаните.

Со ова, Општина Чаир се позиционира како пример за локална самоуправа која сериозно инвестира во иднината на својата заедница.

СВР Скопје ги известува граѓаните дека утре (01.05.2025) со почеток во 11.00 часот поради одржување на протест, Единицата за безбедност на патниот сообраќај ќе преземе мерки за посебен режим на сообраќајот.

Протестот предвидено е да започне пред зградата на ССМ на ул.„Мирче Ацев“ со движење лево по ул.„Филип Втори Македонски“, десно по ул.„11-ти Октомври“, право по ул.„Димитрие Чуповски“, десно по ул.„Васил Главинов“, право по бул.„ВМРО“, лево по бул.„Илинден“ до пред Влада на Р. Северна Македонија.

СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.