Република

ЈЗУ Клиничка болница Тетово: Нема злоупотреба на средства, казната на директорот ќе се одземе од неговата плата

Во врска со тврдењата објавени од одредени медиуми за наводна злоупотреба на финансиски средства на Институцијата за лични потреби од страна на медицинскиот директор, г. Агим Бериша, сакаме да ја информираме јавноста дека овие тврдења не се точни и се целосно неосновани.

Нашата институција е посветена на транспарентноста и почитувањето на највисоките стандарди за финансиско управување и професионална етика. Од оваа причина, чувствуваме потреба да ја информираме јавноста за начинот на кој се управувани средствата во врска со плаќањето на казната изречена на директорот на Клиничката болница.

Со внатрешен акт одобрен од финансискиот сектор во рамките на ЈЗУ Клиничка болница Тетово, донесена е одлука плаќањето на казната изречена на одговорното лице – директорот на Клиничката болница, првично да се изврши од средствата на институцијата. Сепак, оваа уплата не претставува лична корист или злоупотреба на јавните средства, бидејќи исплатената сума автоматски ќе се одземе од платата на директорот во следната исплата на плата, со што ќе се обезбеди дека институцијата финансиски не е оштетена на ниту еден начин.

Оваа постапка е преземена во согласност со внатрешните административни прописи и процедури, со цел да се обезбеди правилно и транспарентно управување со ситуацијата. ЈЗУ Клиничка болница Тетово останува отворена за секој увид или проверка од надлежните органи и е посветена на гарантирање на интегритетот и отчетноста во управувањето со финансиските ресурси на институцијата.

Апелираме до медиумите и јавноста да не подлегнуваат на дезинформации и неосновани шпекулации, кои го нарушуваат угледот на институцијата и нејзините вработени. Ние остануваме отворени за секое прашање или барање за дополнителни информации и ги уверуваме граѓаните дека Клиничката болница Тетово ќе продолжи да работи со целосна одговорност и транспарентност.

Република

Уникатни подводни археолошки наоди откриени во Преспанско Езеро

Во Преспанско Езеро, во близина на селото Наколец, за првпат се реализирани подводни археолошки истражувања кои резултираа со откривање редок и исклучително добро зачуван органски материјал од средновековниот период. Истражувањата ги спроведоа НУ Завод и музеј – Битола и Граѓанската организација за развој на алтернативен туризам „Љубојно“, во рамки на проектот ACT4PRESPA.

Во првите две фази од проектот, стручниот тим изврши рекогносцирање на македонскиот дел од преспанското крајбрежје, од границата со Грција до границата со Албанија, при што беа идентификувани и документирани 11 археолошки локалитети. Како најзначаен за понатамошно истражување се издвоил локалитетот кај селото Наколец, каде што потоа биле спроведени и сондажни археолошки истражувања во два циклуси.

По повлекувањето на нивото на езерото, дел од локалитетите излегле на копно, што овозможило детални археолошки истражувања. На локалитетот кај Наколец бил откриен простор заштитен со дрвена палисада, како и голем број движни археолошки предмети.

Особено значајно е пронаоѓањето предмети изработени од органски материјали, како дрвени алатки, рачки, чешли и различни конструктивни елементи. Според истражувачите, ваквите наоди се прв и засега единствен пример на сочувани органски предмети од археолошки локалитет во Македонија, датиран од крајот на XIII до крајот на XIV век. Локалитетот се толкува и како прв познат пример на благороднички имот од XIV век во македонската археологија.

Истражувачите објаснуваат дека невообичаеното зачувување на органските материјали се должи на милта и тињата на езерото, кои создаваат средина без кислород и го спречуваат распаѓањето на предметите, овозможувајќи редок увид во животот на средновековните заедници во регионот.

Првичните анализи укажуваат дека жителите на средновековна Преспа главно се занимавале со земјоделство, а не со риболов, што претставува изненадување со оглед на непосредната близина на езерото и фактот дека Преспанското Езеро во минатото било значително помало.

Република

Утре дел од Тетово и три тетовски села без електрична енергија

Поради планирани работи на електродистрибутивната мрежа, утре (16 декември 2025 година) без електрична енергија ќе останат делови од Тетово и три тетовски села.

Во периодот од 09:00 до 14:30 часот струја ќе немаат делови од селата Долно Палчиште и Мала Речица, додека во селото Камењане прекинот ќе трае од 09:00 до 14:00 часот.

Во град Тетово, планиран прекин на електричната енергија ќе има од 12:30 до 14:30 часот, и тоа кај објектите што се наоѓаат во близина на Стариот технички.

Од надлежните информираат дека прекините се поради редовно одржување на мрежата и апелираат на разбирање од граѓаните.

Република

Проданоски: Празнична бајка на плоштадот „Методија Андонов – Ченто“

На плоштадот „Методија Андонов – Ченто“ во Прилеп денеска се одржа германски Божиќен базар, кој во празнична атмосфера обедини ученици, наставници, граѓани и гости од повеќе општини низ државата. Настанот беше исполнет со божиќни колачиња и переци, рачно изработени празнични украси, песни на германски јазик и креативни изведби на младите учесници.

Германскиот Божиќен базар беше организиран од Здружението на наставници по германски јазик, со поддршка од Гете-институтот од Скопје, Амбасадата на Сојузна Република Германија во Македонија и Општина Прилеп. Голем интерес предизвика активното учество на ученици од основните и средните училишта во Прилеп, кои преку својата креативност придонесоа за автентична празнична атмосфера.

На настанот присуствуваше и амбасадорката на Сојузна Република Германија, Петра Дрекслер, што, според Проданоски, претставува значајна поддршка и потврда за важноста на ваквите културно-образовни иницијативи.

Проданоски истакна дека ваквите настани им овозможуваат на младите да се запознаат со други култури и традиции, да развиваат почит, толеранција и отвореност кон различностите – вредности кои се основа на современо и европско општество. Тој нагласи дека Прилеп уште еднаш се покажа како град кој ги негува културните настани, ги поддржува младите и живее со празничниот дух.