Со свечен ревијален натпревар меѓу две локални екипи, градоначалникот на општина Брвеница, Јовица Илиевски, вечерва официјално го отвори реновираниот терен за мал фудбал со вештачка трева во селото Челопек.

Новиот спортски терен е изграден со средства од буџетот на општина Брвеница, како дел од проектот „Секое населено место со модерно фудбалско игралиште“, со кој локалната самоуправа има за цел да обезбеди современи спортски услови за сите жители.

Илиевски истакна дека општината ќе продолжи со инвестирање во спортската инфраструктура, со цел младите да добијат квалитетни простори за рекреација, спорт и развој на заедницата.

Оштетување од свлекување на земјиште на коловозот на патот кој минува низ селото Галичник сериозно го загрозува безбедното движење на жителите, посетителите и туристите, информираат од месната заедница. Оттаму апелираат за побрза реакција на надлежните служби.

Осуммина припадници на специјалната единица на МВР, од кои четворица битолчани, на денешен ден пред 24 години, загинаа во масакрот кај селото Вејце, во конфликтот во 2001 година.

Во нивна чест, пред споменикот на загинатите бранители во кругот на СВР Битола, споменикот „Ангел“ кај Саат кулата и споменикот на Бошко Најдовски во Долно Оризари, свежо цвеќе положија градоначалникот на општина Битола, Тони Коњановски, претседателката на Советот Габриела Илиевска со претставници на Советот на општината, полицијата, семејствата на загинатите, политичките партии и граѓаните.

Градоначалникот на општина Битола, Тони Коњановски, истакна дека Битола секогаш ќе се сеќава на Марјан Божиновски, Илче Стојановски, Кире Костадиновски и Бошко Најдовски, со должна почит за прерано загубените млади животи и болката која остана во нивните семејства.

„Денес им оддаваме почит на нашите битолчани, четворицата херои кои го дадоа животот бранејќи ја татковината во Вејце. Да укажеме уште еднаш дека опомена за нас, за сите генерации, за помладите, е тоа дека она што се случило, никогаш повеќе да не се повтори, затоа што само единството, разбирањето, меѓусебната почит, разговорот, можат да не доведат до просперитет на оваа држава и овој град.
Слава на хероите, слава на јунаците, слава на бранителите на нашата таковина!“, рече градоначалникот Тони Коњановски.