Република

Откриен голем скандал во затворот во Штип

Затвореници во затворот во Штип со помош на затворски полицајци се снабдувале со наркотични средства, откри директорот на управата за извршување на санкции, Александар Пандов. На 22 март затворскиот полицаец М.Т незаконски дозволил влез на возило до последната капија од затворот. Од ова возило излегло лице кое фрлило топка преку ѕидот, а од внатрешноста на затворот во потрага по топката се вклучиле двајца затвореници, но и уште четворица затворски полицајци.

„Истите тие затворски полицајци, со батериски лампи и они се вклучуваат во барање на нештото по тревникот од затворот. Наредниот ден не наоѓаат што не наоѓаат, дознава и директорот на затворот…. По наредба на директорот од сабајлето повторно се бара што барале од тревникот, се пронаоѓа топка во ќеса во којашто се пронајдени 35 грама прашкаста материја бидејќи е бела најверојатно кокаин и 50 грама марихуана“, рече Александар Пандов, директор на управата за извршување санкциии.

Затворските полицајци се правдале дека тие барале загубен часовник во сопственост на затвореникот Ж.Ж, кој им кажал дека куче му го украло часовникот и ги замолил за помош.

„Објаснувањето и во нивната службена белешка е дека им било предочено дека затвореникот Ж.Ж си играл со кучката, имаат кучка Цеца таму, дека си играл со кучката Цеца, тој имал скап часовник, којшто морам да потенцирам дека го нема пријавено. Дека му го има земено кучката Цеца часовникот дека трчала низ тревникот и дека го загубила неговиот часовник и овие да му излезат во пресрет го бараат неговиот часовник“, додава Пандов.

За овој случај била формирана и дисциплинска комисија чие мнозинство не пронашло вина кај затворските полицајци, односно им верувале дека тие навистина барале загубен часовник, а не дрога. Сепак, Пандов вели дека овие затворски полицајци кои земаат плата од 57 до 67 илјади денари нема да се толерираат и дека ќе бидат санкционирани за ова дело.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.

Република

Општина Битола: Панел дискусија за унапредување на услугите од јавните претпријатија

Општина Битола и Советот на Општина Битола организираат панел дискусија на тема „Како до подобри услуги за граѓаните од јавните претпријатија“, со цел отворање поширока јавна дебата за улогата и предизвиците на јавните претпријатија како сервис на граѓаните.

Во изминатиот период, јавните претпријатија се соочија со сериозни предизвици, почнувајќи од последиците од ковид пандемијата, преку енергетската криза, до напорите за нивна финансиска и организациска стабилизација. Токму овие состојби ја наметнуваат потребата од системско унапредување на квалитетот на услугите што ги добиваат граѓаните.

На панел дискусијата ќе учествуваат градоначалникот на Битола, претседателот на Советот, директорите на јавните претпријатија, како и експерти од областа. Отворена е покана и за поранешни директори, пратеници, советници, претставници на граѓански организации и медиумите, со цел да се обезбеди инклузивна и конструктивна расправа.

Настанот ќе се одржи в петок, на 19 декември, со почеток во 13:30 часот, во киното „Манаки“ во Битола.