Оштетување од свлекување на земјиште на коловозот на патот кој минува низ селото Галичник сериозно го загрозува безбедното движење на жителите, посетителите и туристите, информираат од месната заедница. Оттаму апелираат за побрза реакција на надлежните служби.

Осуммина припадници на специјалната единица на МВР, од кои четворица битолчани, на денешен ден пред 24 години, загинаа во масакрот кај селото Вејце, во конфликтот во 2001 година.

Во нивна чест, пред споменикот на загинатите бранители во кругот на СВР Битола, споменикот „Ангел“ кај Саат кулата и споменикот на Бошко Најдовски во Долно Оризари, свежо цвеќе положија градоначалникот на општина Битола, Тони Коњановски, претседателката на Советот Габриела Илиевска со претставници на Советот на општината, полицијата, семејствата на загинатите, политичките партии и граѓаните.

Градоначалникот на општина Битола, Тони Коњановски, истакна дека Битола секогаш ќе се сеќава на Марјан Божиновски, Илче Стојановски, Кире Костадиновски и Бошко Најдовски, со должна почит за прерано загубените млади животи и болката која остана во нивните семејства.

„Денес им оддаваме почит на нашите битолчани, четворицата херои кои го дадоа животот бранејќи ја татковината во Вејце. Да укажеме уште еднаш дека опомена за нас, за сите генерации, за помладите, е тоа дека она што се случило, никогаш повеќе да не се повтори, затоа што само единството, разбирањето, меѓусебната почит, разговорот, можат да не доведат до просперитет на оваа држава и овој град.
Слава на хероите, слава на јунаците, слава на бранителите на нашата таковина!“, рече градоначалникот Тони Коњановски.

Продолжува изградбата на тротоар и атмосферска канализација на улица 10 во општина Арачиново, проект кој е од големо значење за локалното население. Работите се изведуваат со засилено темпо, а активностите денеска ги посети Изет Меџити, прв вицепремиер и министер за животна средина и просторно планирање.

Меџити изјави дека инфраструктурните проекти од ваков тип се клучни за подобрување на квалитетот на животот во општините и најави дека Владата ќе продолжи со инвестиции во локалниот развој. Тој посочи дека подобрената атмосферска канализација ќе го намали ризикот од поплави, а изградбата на нови тротоари ќе ја зголеми безбедноста на пешаците.

„Граѓаните заслужуваат подобра инфраструктура, уредени улици и сигурно движење. Ова е само дел од поширокиот план за модернизација на општините“, истакна Меџити.

Проектот е во завршна фаза и се очекува целосното завршување во следните неколку недели.