Македонија

ДУИ бара повлекување на назначувањето на Петар Богојевски: „Навредите кон Албанците се наградуваат со функции“

Демократската унија за интеграција (ДУИ) остро реагираше на одлуката на Владата за именување на Петар Богојевски за раководител на Агенцијата за европски образовни фондови, нарекувајќи ја оваа одлука „срамна“ и „директна провокација“.

Во партиското соопштение, ДУИ оцени дека се работи за поединец кој „целата своја јавна и политичка кариера ја изгради со навреди и омаловажувања кон Албанците“, што според нив е несоодветно за позиција која има мандат да ги приближува младите кон европските вредности.

„Овој чин испраќа опасна порака – дека навредите кон Албанците не само што не се санкционираат, туку и се наградуваат со државни позиции“, стои во реакцијата.

ДУИ дополнително истакнува дека е иронично што токму партиите на вЛЕН, кои претходно поднеле кривична пријава против Богојевски, сега го поддржуваат неговото именување.

„Доверувањето на управувањето со европски фондови на човек кој упатувал навредливи пораки до Албанците и до самата Европска унија претставува понижување за европските партнери и даночните обврзници на ЕУ“, нагласуваат од партијата.

ДУИ бара Владата итно да ја повлече одлуката и да ја врати сериозноста во институциите поврзани со европската интеграција, образованието и соживотот. „Државата не смее да биде сцена за евтини провокации, особено не на сметка на соживотот и европската перспектива“, се наведува во реакцијата.

Македонија

Отворена за сообраќај клучката кај Подмоље на автопатот Охрид–Кичево

Сообраќајниот крак – клучката на автопатската делница Охрид–Кичево, кај селото Подмоље, е пуштен во редовен сообраќај, информираат од СВР Охрид. Со ова се нормализира сообраќајот на повеќе фреквентни правци, меѓу кои Охрид–Кичево–Скопје, Охрид–Струга, Струга–Кичево–Скопје и Струга–Охрид, без какви било дополнителни ограничувања.

Од полицијата нагласуваат дека клучката е целосно функционална и апелираат до сите учесници во сообраќајот да возат внимателно и одговорно. Возачите на патнички и други моторни возила се повикуваат строго да ги почитуваат сообраќајните правила и прописи, како и поставената хоризонтална и вертикална сигнализација, со цел да се зголеми безбедноста на патиштата и да се избегнат несакани инциденти.

Македонија

Јаневска: Загадениот воздух нема да донесе предвремен зимски распуст

Министерката за образование, Весна Јаневска, денеска увери дека учениците ќе продолжат со настава до крајот на месецов и потоа ќе заминат на редовниот зимски распуст, без предвремено распуштање поради загадениот воздух.

„Остануваат уште малку денови до распустот и во овој момент немаме информации дека здравјето на децата е загрозено“, истакна Јаневска одговарајќи на новинарско прашање при посетата на Економскиот факултет на УКИМ. Таа додаде дека отсуствувањето ден-два поради здравствени причини не е проблем, но дека мора да се избегне негативната практика од минатото, кога се скратувале учебните денови поради различни причини.

„Жалам што морам да направам груба споредба, но во некои европски земји децата одат на настава дури и кога имаат грип, се додека нивното здравје не е сериозно загрозено. Нашите ученици не се пренатрупани со учење, и доколку нема сериозен здравствен ризик, не е проблем да отсуствуваат еден-два дена. Проблем беше кога се скратуваа учебните денови заради поевтини одмори или подготовки за писмени испити. Тие негативни појави треба да ги отстрануваме“, нагласи министерката.

Јаневска потенцираше дека одлуките секогаш ќе бидат носени во интерес на здравјето на децата, а во овој момент нема сигнал дека наставата е во опасност по нивното здравје.

Македонија

Советот на Битола добива дигитален пресврт: Бојкоски најавува електронско гласање

Советот на Општина Битола започна со нова, модерна практика – воведување пилот-проект за електронско гласање, кој ветува побрзи, поефикасни и по транспарентни седници од кога било досега.

Претседателот на Советот, Бојкоски, истакна дека на денешната Комисија за јавни дејности членовите имаа можност да го тестираат системот во практика. „Во периодот што следи, истиот ќе се имплементира и на останатите комисии“, соопшти Бојкоски.

Интересно, системот за електронско гласање е целосно развиен од ИТ тимот на општината, без ангажирање на надворешни фирми и без дополнителни трошоци за буџетот на Општина Битола.

„Ова е уште еден чекор кон модерна, транспарентна и одговорна локална самоуправа, во интерес на граѓаните на Битола“, додаде Бојкоски.

Според најавите, електронското гласање ќе го забрза процесот на донесување одлуки и ќе ја зголеми отчетноста на членовите на Советот. Сепак, за да се обезбеди веродостојност, ќе се потврдува и физичкото присуство на лицето задолжено за верификација.