Свет

Израелски борбени пилоти ја повикаа владата: Заложниците се приоритет, дури и ако војната мора да престане

Речиси илјада пензионирани и резервни израелски борбени пилоти во четвртокот ја повикаа владата во отворено писмо да даде приоритет на ослободувањето на преостанатите заложници во Газа, дури и ако тоа значи ставање крај на војната против палестинското движење Хамас.

Израелски воен претставник рече дека потписниците кои се на активна должност ќе бидат отпуштени поради писмото, во кое се вели дека војната – која Израел ја продолжи минатиот месец по двомесечен прекин на огнот – „главно им служи на лични и политички интереси наместо на реални безбедносни потреби“.

Премиерот Бенјамин Нетанјаху рече дека ги поддржува отпуштањата, бидејќи тоа се „неоправдани изјави кои ги ослабуваат IDF (Израелските одбранбени сили) и ги зајакнуваат нашите непријатели во време на војна“.

Писмото, кое го објавија неколку израелски медиуми, го потпишаа 980 резервисти, изјави еден од потписниците за Reuters. Во писмото се бара „итно враќање на сите наши заложници без одлагање, дури и по цена веднаш да се запре војната“.

Војната започна откако палестинските милитанти предводени од Хамас го нападнаа јужниот дел на Израел на 7 октомври 2023 година, убивајќи околу 1.200 цивили и припадници на безбедносните служби и земајќи 251 заложници, според израелските податоци. Оттогаш, израелската војска убила повеќе од 50.000 Палестинци, најмногу деца и жени, во копнени и воздушни напади и ја опустоши Газа, соопштија локалните здравствени власти.

Минатиот месец Израел го заврши примирјето постигнато во јануари, откако двете страни не успеаја да се договорат за условите за неговото продолжување. Израел соопшти дека неговите воени операции ќе продолжат се додека не се вратат преостанатите 59 заложници кои се уште ги држат Хамас и другите милитантни групи. Хамас вели дека нема да ги ослободи без договор кој трајно ќе стави крај на војната.

Членовите на семејствата на заложниците и демонстрантите ја повикаа десничарската влада на Нетанјаху да склучи договор со Хамас за ослободување на заложниците, дури и доколку тоа бара Израел целосно да се повлече од Газа и да го прекине конфликтот.

Нетанјаху вели дека Израел ќе продолжи да се бори сѐ додека не се постигнат сите негови цели, вклучително и одземање на способноста на Хамас да владее со Газа, и дека таквиот пристап на крајот ќе ги ослободи заложниците.

Еден израелски воен функционер излавил за Reuters дека нема место „резервистите на активна должност да го искористат својот воен статус (политички) додека истовремено учествуваат во борбите“. Службеникот го нарекол писмото „сериозно нарушување на довербата меѓу командантите и подредените“.

Анкетата објавена во четвртокот од страна на Израелскиот институт за демократија покажа зголемена поддршка за давање приоритет на ослободувањето на заложниците наместо елиминацијата на Хамас. Анкетата покажува дека 68 отсто од Израелците веруваат дека носењето на заложниците дома треба да биде најголем приоритет.

Во меѓувреме израелскиот Висок суд на правдата ја отфрли во четвртокот петицијата поднесена од семејствата на заложниците кои бараат обновување на снабдувањето со електрична енергија на Појасот Газа, запрено од Израел извесен период по почетокот на инвазијата, пренесе порталот Ynet.

Свет

Јужноафриканци принудно на фронтот во Донбас: „Не разбравме што потпишуваме“

Јужноафрикански мажи, меѓу кои и постариот брат на Бонгани од покраината Квазулу-Натал, завршиле на фронтот во Донбас, тврди семејството, откако биле регрутирани под лажни ветувања за обука како телохранители.

„Тие немаат воена обука и никогаш не виделе војна. Беше им кажано дека ќе добијат работа за да ги прехранат семејствата, но се најдоа на бојното поле“, изјави Бонгани, чие име е променето за безбедност.

Според сведоштвата, јужноафриканските мажи отпатувале во Русија преку Дубаи, потпишале договори на руски јазик без можност за превод и веднаш биле испратени во Украина. „Проблемите започнаа кога ги префрлија од Русија во Украина и рекоа дека тоа е обука, а потоа ни рекоа дека сме под команда на руската армија“, раскажува Бонгани.

„Скај њуз“ добил пристап до видео пораки од мажи кои тврдат дека биле принудени на борба, а една од нивните контакти била Дудузиле Зума-Самбудла, ќерката на поранешниот јужноафрикански претседател Џејкоб Зума, која ги убедила да потпишат.

Во Јоханесбург, пет лица биле уапсени по пријава дека патувале во Русија преку ОАЕ, меѓу нив и 21-годишник и 39-годишна Патриша Мантуала, обвинета за регрутирање. Судот им одобри кауција, а полицијата не ја исклучува можноста за повеќе апсења.

Семејствата на заробените мажи се обидуваат да ги вратат дома, и покрај опасностите и неизвесноста што ја носи конфликтот. „Никој не е безбеден и никогаш не знаеме што може да ни се случи следно“, вели Бонгани.

Свет

Полскиот претседател: Зеленски недоволно ја цени помошта на Полска за Украина

Полскиот претседател Карол Навроцки денеска во Варшава изнесе критики кон украинскиот лидер Володимир Зеленски, тврдејќи дека Украина не ја цени доволно поддршката што Полска ѝ ја дава во конфликтот со Русија.

Навроцки истакна дека Полска од почетокот на руската инвазија во 2022 година прифатила повеќе од еден милион украински бегалци и е еден од главните добавувачи на оружје и хуманитарна помош за Украина. „Полјаците сметаат дека нашите напори и помошта за Украина не се доволно ценети или разбрани“, рече тој, додавајќи дека ова му го пренел на Зеленски во „решителен и искрен, но и срдечен разговор“.

Зеленски од своја страна нагласи дека Украина отсекогаш била благодарна за полската помош и ќе продолжи да ја цени, посочувајќи дека Украина ја брани Европа од руската агресија по висока човечка цена.

Свет

Американски разузнавачи: Путин сака целосна контрола над Украина и пошироки територии во Европа

Американските разузнавачки служби предупредија дека рускиот претседател Владимир Путин има намера да ја окупира целата Украина и да ја прошири контролата над делови од Европа што некогаш припаѓале на Советскиот Сојуз, и покрај тековните мировни преговори.

Украинската разузнавачка служба, предводена од генерал-потполковникот Кирило Буданов, исто така оцени дека Русија продолжува да има амбиции за проширување на територијата.

Според шест извори запознаени со податоците на американската разузнавачка служба, воените цели на Путин остануваат непроменети, што е спротивно на изјавите на американскиот претседател Доналд Трамп и неговите преговарачи дека Путин бара крај на конфликтот. Европските лидери, како и американските експерти, веруваат дека Путин има намера да контролира целата Украина и територии од поранешниот Советски Сојуз, вклучително и некои членки на НАТО.

„Разузнавањето отсекогаш велеше дека Путин сака повеќе“, изјави Мајк Кугли, демократски член на Комитетот за разузнавање на Претставничкиот дом. „Европјаните се убедени во тоа. Полјаците се апсолутно убедени, а балтичките земји мислат дека се првите кои го знаеле тоа.“

Во моментов, Русија контролира околу 20% од украинската територија, вклучувајќи ги анектираните покраини Луганск, Донецк, Запорожје, Херсон и Крим. Трамп, како дел од предложениот мировен договор, врши притисок врз Киев да повлече дел од своите сили од мал дел од Донецк, што Зеленски и мнозинството Украинци категорично го отфрлаат.

Иако Белата куќа најавува „огромен напредок“ во мировните преговори, Путин на својата годишна прес-конференција не понуди компромиси и нагласи дека неговите услови мора да бидат исполнети. Според официјални податоци, руските сили напредувале за околу 6.000 квадратни километри оваа година.

Американски официјални лица, меѓу кои и државниот секретар Марко Рубио, признаваат дека е неизвесно дали Путин навистина сака мировен договор или неговата цел е целосна контрола над Украина.