Република

Коњановски: Пелистер е симбол на обединување и двигател на локалниот развој

Градоначалникот на Битола, Тони Коњановски, на средбата на Советот на засегнатите страни организирана од НП Пелистер, ја истакна важноста на Пелистер како ресурс кој има потенцијал да биде клучен двигател за економскиот развој на регионот.

„Потенцијалите кои ги има Пелистер се огромни, добро познати на сите, но се уште недоволно искористени. Она што го нуди студијата треба да ни помогне да ги согледаме и постојните и скриените можности. Да ги примениме европските искуства и да изградиме еден еколошки и одржлив туризам кој ќе придонесе за развој на целата заедница“, истакна Коњановски.

На настанот во салата на Советот на општина Битола беше промовирана новата Студија за развој на летниот и зимскиот туризам на Пелистер, финансирана од општината согласно Програмата за туризам. Присуствуваа претставници од НП Пелистер, професори од Факултетот за туризам, советници и љубители на планината.

Градоначалникот посочи дека Пелистер не припаѓа само на Битола, туку на целиот регион и оттука произлегува потребата за заедничко делување во насока на негов одржлив развој. Според него, туризмот е ресурс кој може да обезбеди нова економска динамика, но само ако се води грижа за заштитата на природата и вклученоста на локалната заедница.

На средбата беа презентирани и новото лого и веб-страницата на Националниот парк, а директорот Иванчо Тошевски ги изложи предизвиците и плановите за 2025 година, вклучително и воспоставувањето на систем на планински патеки.

Проф. д-р Сашо Коруновки, како еден од авторите на студијата, нагласи дека целта е не само да се промовира туризмот, туку и да се зачуваат вредностите на Пелистер за идните генерации преку одржлива и паметна туристичка понуда.

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.