Спорт

Тетово доби нов спортски центар – инвестиција во младите и спортот

Во присуство на министерот за спорт Борко Ристовски и градоначалникот на Тетово, Биљал Касами, денеска беа отворени новите спортски терени во рамки на ОСМУ „Никола Штејн“. Новиот спортски центар претставува значаен чекор напред во развојот на спортската инфраструктура во градот и пошироко.

Целта на проектот е јасна – да се создадат услови за спорт и рекреација на младите, како и да се поттикне здрав начин на живот и натпреварувачки дух.

Во рамките на новиот центар се изградени:

• фудбалско игралиште со вештачка трева,

• терен за одбојка со вештачка подлога,

• кошаркарско игралиште со полипропиленски под според ФИБА стандарди,

• трибина со капацитет од околу 300 седишта.

„Ова е уште еден доказ дека инвестираме со цел и визија. Продолжуваме да работиме посветено на современа и достапна спортска инфраструктура ширум целата држава,“ изјави министерот Ристовски.

Спорт

Селта со огромна сензација: Реал Мадрид поразен на „Бернабеу“, Сведберг блескаше со два гола

Реал Мадрид доживеа шокантен пораз на свој терен, откако Селта Виго приреди вистинска сензација и го совлада гигантот на „Сантијаго Бернабеу“. Херој на мечот беше 21-годишниот шведски напаѓач Вилиот Сведберг, кој со два погодоци го реши дуелот и ја прослави веројатно најзначајната вечер во својата кариера.

Младиот талент одигра блескава партија и целосно ја изненади одбраната на Реал. Неговите два гола не само што му донесоа победа на Селта, туку и создадоа приказна која навивачите долго ќе ја паметат. Селта со оваа победа направи вистинска сензација, нанесувајќи му на Реал еден од најболезнените порази оваа сезона.

Реал Мадрид влезе како апсолутен фаворит, но гостите од Виго покажаа дисциплина, брзина и одлична ефикасност. Дури и доминацијата во посед и шансите не му помогнаа на Реал да избегне пораз, а Сведберг повторно потврди дека е еден од најперспективните напаѓачи во европскиот фудбал.

Со оваа победа, Селта испиша историја на „Бернабеу“, а мечот веќе се смета за едно од најголемите изненадувања во тековната сезона на Ла Лига.

Спорт

Ландо Норис со историска круна во драматичен финиш на сезоната

Возачот на Мекларен, Ландо Норис, и официјално е новиот светски шампион во Формула 1. Во една од највозбудливите и најнеизвесни сезони во последната деценија, Британецот со минимална предност од само два бода над актуелниот шампион Макс Верстапен ја освои својата прва титула во кариерата.

Во последната трка од сезоната, возена во Абу Даби, Верстапен стигна до победата, но третото место на Норис му беше доволно за да го задржи врвот во генералниот пласман. На подиумот се искачи и Оскар Пјастри, тимскиот колега на Норис во Мекларен, кој заврши втор на трката, а сезоната ја комплетираше како трет во генералниот поредок.

Мекларен одамна ја имаше осигурено титулата кај конструкторите, оставајќи ги зад себе Мерцедес и Ред Бул во една доминантна година за тимот од Вокинг.

Спорт

Битола во зелено-бела еуфорија: Салата „Боро Чурлевски“ распродадена за дербито со Вардар

Битола повторно потврди дека ракометот е дел од срцето на градот. За дербито меѓу РК Пелистер и РК Вардар, сите билети се распродадени, а салата „Боро Чурлевски“ ќе прелива од навивачи.

Во среда, зелено-белите поддржувачи ќе го претворат спортскиот дом во вистински вулкан на емоции, носејќи го градот низ магијата на ракометот. Традицијата, страста и победничкиот дух на Битола повторно ќе се чувствуваат во секој агол на арената.

Само Битола, само Пелистер, само зелено-белиот дух.