Британските воени и разузнавачки власти предупредија дека Европа мора да биде подготвена за сериозна безбедносна криза, откако министрите и воените началници истакнаа дека заканите драматично се зголемуваат.

На отворањето на новата Британска воена разузнавачка служба (МИС) во базата на Кралските воздухопловни сили Вајтон, министерот за одбрана Ал Карнс изјави дека „сенката на војната тропа на вратата на Европа“. Тој нагласи дека НАТО сојузниците мора да бидат подготвени да реагираат, бидејќи континентот веќе не се соочува со „војни по избор“, туку со „војни од нужда“, како што ја опиша руската инвазија врз Украина.

Началникот на Одбранбената разузнавачка служба, Адријан Берд, откри дека непријателската разузнавачка активност насочена против британскиот воен персонал и инфраструктура пораснала за повеќе од 50% во изминатата година, главно од Иран, Кина и Русија.

Новата служба МИС ќе ги обедини разузнавачките капацитети на Британската армија, Кралската морнарица и Кралските воздухопловни сили со цел побрза размена на информации — препорака од Стратешкиот одбранбен преглед. Во рамки на базата ќе функционира и новата Единица за контраразузнавање за одбрана, задолжена за спречување странски влијанија врз опремата, системите и персоналот.

Во Вајтон веќе работи и Pathfinder – најголемиот разузнавачки центар во рамките на сојузот „пет очи“. Персоналот ќе следи широк спектар податоци: од сателитски снимки и материјали собрани од беспилотни летала до информации од агенти на терен.

По критичкиот извештај на Комитетот за одбрана за подготвеноста на Велика Британија за потенцијален конфликт, Карнс увери дека реорганизацијата ќе помогне „одвраќањето да биде апсолутно безгрешно“.

Тој ја повика и британската јавност да ја сфати сериозноста на ситуацијата, бидејќи надворешните закани директно влијаат врз секојдневниот живот – од цените на храна и гориво до буџетските трошоци.

Предупредувањата доаѓаат по сличниот апел на генералниот секретар на НАТО, Марк Руте, кој во Берлин изјави дека „Русија ја врати војната во Европа“ и дека земјите мора да бидат подготвени за предизвици налик на оние што ги поминале претходните генерации.

Дополнително, високите претставници признаа дека земјата се соочува со сериозни проблеми во регрутирањето кадар за разузнавачките служби. Министерката за ветерани, Луиз Сандер-Џонс, посочи дека состојбата мора итно да се промени, бидејќи резултатите во последните години не ги исполнуваат очекувањата.

Американскиот претседател Доналд Трамп објави дека САД се подготвуваат да започнат операции насочени кон копнените маршрути преку кои, според Вашингтон, се пренесуваат пратки со дрога од Венецуела кон северноамериканскиот континент.

Во последните недели Трамп неколкупати јавно предупреди дека ќе нареди директни акции со цел пресретнување на кокатинските пратки што се движат по копнен пат. Во рамките на пошироката кампања против наркокартелите, американската армија веќе делува и во Карипското Море, каде што пресретнува пловила за кои постојат сомнежи дека се користат за шверц на дрога.

Венецуелскиот претседател Николас Мадуро, пак, тврди дека војната против наркокартелите е само прикритие за поширока геополитичка цел. Според него, вистинската намера на Вашингтон е да го смени режимот во Каракас и да стави рака врз богатите венецуелски нафтени ресурси.

Американската администрација засега ги отфрла ваквите обвинувања, но најавите за офанзива по копнените рути дополнително ги заоструваат веќе напнатите односи меѓу двете земји.

Украинските сили успеаја да спречат масовен руски напад врз Покровск, притоа уништувајќи цела оклопна колона која се обидела да влезе во градот. Новите снимки од дрон прикажуваат десетици уништени и запалени руски воени возила распоредени долж патот во овој стратешки важен град во источна Украина.

Борбите за Покровск, клучно логистичко јадро во Донечката област, траат повеќе од една година. Иако рускиот претседател Владимир Путин неодамна објави дека градот паднал, украинските власти тврдат дека оваа изјава имала политичка цел – влијание врз мирoвните преговори и обид да се убеди Доналд Трамп во „неминовната“ руска победа. Како доказ дека градот сè уште не е целосно окупиран, Киев истакнува дека украинските сили држат позиции на северниот дел од Покровск, а во вторникот беше објавено видео од украински војници кои истакнуваат знаме на тие позиции.

Пред руската инвазија во февруари 2022 година, во Покровск живееја околу 60.000 жители. Украинските команданти соопштија дека во средата имало невообичаено голем руски механизиран напад во градот, каде Москва, според проценките, концентрирала околу 170.000 војници. „Русите користеа оклопни возила, автомобили и мотоцикли. Конвоите се обидоа да пробијат од југ кон северниот дел на градот,“ соопшти украинскиот 7. корпус за брзо дејствување.

Освојувањето на Покровск, кој се наоѓа на возвишение, би претставувало прв поголем руски успех од падот на Авдиивка во почетокот на 2024 година. Кремљ смета дека контролата врз градот би ја отворила вратата кон остатокот од Донбас – територија чија предавање Путин ја бара како услов во секој можен мировен договор.

Сепак, воените аналитичари предупредуваат дека евентуалниот пад на Покровск не би довел до распад на украинската одбрана. Причината е што Украина со години ги утврдуваше блиските градови Краматорск, Словјанск, Костјантивка и Дружкивка – заедно нарекувани „појасот на тврдини“, кој и понатаму претставува силна линија на отпор.