Нов руски напад врз Харков – едно загинато лице и над 60 повредени

Во најновиот руски напад врз вториот по големина украински град, Харков, утрово животот го загуби едно лице, а најмалку 60 други се повредени, информира Државната служба за вонредни состојби на Украина.

Градоначалникот на Харков, Ихор Терехов, соопшти дека нападот предизвикал голема материјална штета – оштетени се најмалку 20 станбени згради и 30 приватни куќи. Според првичните информации, нападот бил извршен со балистички ракети, опремени со касетна муниција – оружје што остава долгорочни последици за цивилното население.

Ова е веќе трет масовен напад врз цивилна инфраструктура во Украина од почетокот на годинава. Претходно, слични напади со многу жртви беа извршени врз градовите Суми и Криви Рих.

Ситуацијата останува напната, а украинските власти постојано апелираат до меѓународната заедница за дополнителна помош во заштита на цивилното население од ваквите напади.

Претседателот на САД Доналд Трамп, изјави денеска дека Вашингтон очекува до крајот на оваа недела да добие одговор од рускиот претседател Владимир Путин за предлогот за прекин на огнот во Украина.

– Ќе го слушнеме нивниот одговор многу скоро, всушност оваа недела. Ние сакаме убиствата да престанат, рече Трамп на пресот со премиерката на Италија Џорџа Мелони во Белата куќа.

Трамп, исто така, повторно зборуваше за украинскиот претседател Володимир Зеленски.

– Не сум задоволен со него. Не го обвинувам, но велам дека не ја заврши најдобро работата. Не сум голем обожавател, рече Трамп за својот украински колега.

Трамп посочи дека Русија има многу поголема армија од Украина и повторно го обвини неговиот претходник Џо Бајден за војната, како што направи неодамна кога ги обвини и рускиот претседател Владимир Путин и украинскиот Зеленски.

Додаде дека САД и Украина може да потпишат договор за природни ресурси најдоцна до 24 април. Според него, договорот овозможува Америка да ги надомести трошоците за воената помош дадена на Киев.

Според „Блумберг“  износот на овој „долг“ бил намален трикратно во текот на преговорите – од 300 милијарди на 100 милијарди долари.

САД се подготвени да воведат нови санкции против Русија доколку Путин не прифати примирје до крајот на април, според извори на „Аксиос“.

Трамп бил незадоволен од однесувањето на Путин и смета дека тој намерно го одложува преговарачкиот процес, дозна претходно „Фокс њуз“, Според истите извори, Белата куќа разгледува можност за строги санкции против руската „флота во сенка“. Трамп претходно изјави дека може да воведе тарифи и до 500 отсто за земјите што купуваат руска нафта.

Катастрофални поплави во Италија: Едно лице загина, две се водат како исчезнати

Обилните врнежи од дожд предизвикаа катастрофални поплави во делови од Италија, при што најмалку едно лице го загуби животот, а две се водат како исчезнати.

Жртвата е 92-годишен маж кој останал заробен во својата куќа погодена од надојдените води. Поплавите активираа повеќе свлечишта и одрони, а бројни реки излегоа од своите корита.

Во регионот Пијемонте е прогласен портокалов метео аларм, а иако денеска се очекува благо подобрување на временските услови, метеоролозите предупредуваат на нов бран врнежи по Велигден.

Во областа Виченца, спасувачките служби интензивно трагаат по две исчезнати лица – татко и син – чие возило било однесено од надојдената река Ањо.

Автопатот А5 Торино-Аоста е затворен поради нагло зголемување на нивото на реката Дора Балтеа. Во Долината Аоста, тунелот Гран Сан Бернардо е затворен поради снежни врнежи, додека во Ломбардија реката Сезија се излеа, предизвикувајќи поплави во провинцијата Павија.

Во Милано, градските власти беа принудени да ги затворат сите јавни паркови поради силниот ветер и дожд, а во Рим, противпожарната служба интервенирала повеќе од 100 пати поради урагански ветрови кои уриваа дрвја и кршеа гранки.