Украинските сили тврдат дека погодиле фабрика за дронови во срцето на Русија

Украинската армија објави дека погодила фабрика за производство на далекосежни дронови во руската република Татарстан, оштетувајќи клучна монтажна линија за беспилотни летала. Според соопштението на украинскиот Генералштаб објавено на Телеграм, станува збор за постројка со дневен капацитет од 300 дронови.

„За сега е потврдено дека е оштетена линијата за склопување на UAV – беспилотни воздушни возила“, соопштија украинските воени власти.

Руската војска, од почетокот на инвазијата врз Украина пред три години, интензивно користи различни видови дронови, вклучително и иранските “Шахед” – автономни камиказе-дронови, кои често се користат за удари врз украинска инфраструктура и цивилни цели.

Украина, како одговор на овие напади, во средата навечер соопшти дека неутрализирала дури 134 руски дронови.

Според локалните власти во градот Јелабуга, во близина на погодената фабрика бил соборен еден дрон. Telegram каналот „Mash“, кој се смета за близок до руските безбедносни служби, објави дека во истата област се соборени најмалку четири дронови.

Украинскиот Генералштаб соопшти дека силите задолжени за беспилотни летала, заедно со други единици, извршиле координирани експлозии во близина на фабриката, која се наоѓа на 1054 километри од украинската граница.

Овој настан доаѓа во време на засилена активност на украинските дронови зад линијата на фронтот, што уште еднаш ја потенцира нивната зголемена улога во модерното војување и подготвеноста на Киев да ги префрли операциите длабоко во територијата на противникот.

Русија не ја исклучува употребата на нуклеарно оружје во случај на агресија од западните земји – оваа експлозивна изјава ја даде денеска високиот руски безбедносен функционер Сергеј Шојгу во интервју за државната агенција ТАСС.

Шојгу, поранешен министер за одбрана, а сега шеф на Советот за безбедност, јасно порача дека Москва ќе реагира жестоко ако почувствува закана за својот или за суверенитетот на нејзините сојузници. Според новоусвоената нуклеарна доктрина, Русија може да одговори со нуклеарен напад и во случај на „конвенционален напад“ што ќе предизвика „критична закана“ за Русија или Белорусија.

Овие пораки доаѓаат во момент кога новата администрација во Вашингтон, предводена од Доналд Трамп и потпретседателот Џеј Ди Венс, драматично ја менува американската стратегија за Украина. Наместо притисок врз Москва, Трамп сега врши притисок врз Киев да прифати прекин на огнот – и тоа по секоја цена.

Шојгу предупреди дека „симетрични и асиметрични мерки“ ќе бидат преземени против секоја земја што ќе се обиде да ја загрози безбедноста на Русија. Изјавата веднаш предизвика реакции во европските и американските безбедносни кругови, кои веќе ја разгледуваат сериозноста на новите руски закани.

Останува нејасно дали овој нов чекор води кон дипломатско решение – или светот се приближува до нова, уште поопасна ескалација.

Американскиот претседател Доналд Трамп изјави дека Русија е подготвена да потпише мировен договор, но дека убедувањето на Украина да се согласи на договорот „е потешко отколку што очекувал“, јавува Анадолу.

„Мислам дека имаме договор со Русија. Треба да постигнеме договор со Зеленски и се надевам дека ќе успееме. Мислев дека ќе биде полесно да се постигне договор со Зеленски. Досега тоа беше потешко. Но добро, тоа е во ред“, изјави Трамп пред новинарите во Белата куќа.

Тој додаде дека верува оти постои „договор од двете страни“ и изрази надеж дека ќе се реализира.

„Сакам да спасам животи. Трошиме многу пари, но овде станува збор за хуманост“, порача Трамп.

Го нападна Зеленски поради Крим

Порано истиот ден, Трамп го критикуваше украинскиот претседател Володимир Зеленски поради изјава дадена на прес-конференција во вторникот, во која ја исклучи можноста за признавање на руската окупација на Крим.

„Таa изјава е многу штетна за мировните преговори со Русија, имајќи предвид дека Крим беше изгубен пред многу години, кога претседател беше Барак Обама, и повеќе не е ни тема за разговор“, напиша Трамп на социјалните мрежи. 

„Никој не бара од Зеленски да го признае Крим како руска територија, но ако толку го сака, зошто не се бореа за него пред единаесет години кога беше предаден на Русија без испукан куршум?“

„Не ми е важно чив е Крим. Само сакам крај на војната“

На прашањето дали договорот што, според него, Русија го прифаќа, вклучува и признавање на рускиот суверенитет над Крим, Трамп одговори неодредено:

„Сè е во ред. Гледајте, јас само сакам војната да заврши. Не ми е важно. Ако двете страни се задоволни и потпишат договор, тоа е најважното. Немам фаворити. Само сакам договор. Сакам да се спасуваат животи.“

Можна средба со Путин

Трамп најави дека постои можност за средба со Владимир Путин средината на мај, за време на планирана посета на Саудиска Арабија, но додаде дека таа средба „најверојатно тогаш нема да се случи“.

„Мислам дека ќе се сретнеме набргу потоа“, рече тој.