Хамас подготвен да ги ослободи сите израелски заложници во замена за крај на војната во Газа
Висок претставник на Хамас изјави дека организацијата е подготвена да ги ослободи сите израелски заложници, доколку добие гаранции дека Израел ќе го прекине воениот конфликт во Појасот Газа и ќе ги повлече своите сили.
Оваа изјава доаѓа откако делегација на Хамас викендов отпатува во Каиро на разговори со египетски и катарски посредници, поддржани од САД, за можно примирје.
– Подготвени сме да ги ослободиме сите израелски заложници како дел од вистински договор за размена, во замена за крај на војната, повлекување на израелските сили од Газа и непречен влез на хуманитарна помош – изјави Тахер ал-Нуну за AFP, еден од високите претставници на Хамас.
Тој го обвини Израел дека го блокира напредокот кон договор и додаде дека Хамас бара цврсти гаранции за почитување на евентуален договор. Според него, Израел не ја исполнил својата обврска за примирје и го продолжил конфликтот.
Во меѓувреме, израелскиот новински портал Ynet објави дека Хамас добил нов предлог што вклучува ослободување на десет живи заложници во замена за американски гаранции дека Израел ќе пристапи кон следна фаза од примирјето.
Првата фаза од прекинот на огнот (јануари–март 2025) овозможи ослободување на 33 заложници, вклучувајќи и осум загинати, во замена за околу 1.800 палестински затвореници.
Семејствата на заложниците во Израел се против фазен пристап и бараат итно и целосно ослободување на сите. „Државата Израел има обврска да ги врати сите – сега и одеднаш“, се наведува во нивното соопштение.
Ал-Нуну исто така истакна дека Хамас нема да прифати услови за разоружување. „Оружјето на отпорот не е тема за преговори“, рече тој.
Воениот конфликт започна на 7 октомври 2023 година со напад на Хамас врз јужен Израел, во кој загинаа 1.218 лица, според податоци на израелските власти. Израелската армија информира дека 58 заложници сè уште се наоѓаат во Газа, од кои 34 се загинати.
Според Министерството за здравство на Хамас, бројот на загинати во Газа од продолжувањето на израелските напади на 18 март изнесува најмалку 1.574, со што вкупниот број на жртви од почетокот на конфликтот достигна 50.944.
