Син на висока функционерка на ЦИА загина во Украина – се борел на страна на руската армија?

Централната разузнавачка агенција на САД (ЦИА) ја потврди смртта на 21-годишниот Мајкл Глос, син на заменичката директорка на ЦИА за дигитални иновации, Џулијана Галина Глос, објави NBC News.

Според информациите што ги пренесува порталот Index.hr, Мајкл се приклучил на руската војска и загинал во борбите во Украина. Американската агенција официјално ја потврди неговата смрт, но во соопштението нагласи дека станува збор за „лична семејна трагедија“ a не прашање на национална безбедност.

ЦИА: „Семејна трагедија, не безбедносна закана“

„ЦИА ја смета смртта на Мајкл Глос за приватна работа на семејството Глос. Се работи за трагичен настан, а не за безбедносно прашање“, изјави портпарол на агенцијата.

Прв ја објави веста рускиот истражувачки портал Important Stories, повикувајќи се на руски извори и профилите на Глос на социјалните мрежи. На неговиот профил на VKontakte се објавени фотографии од Црвениот плоштад и изрази на поддршка кон руската армија, како и критики кон украинската војска која ја нарекува „корумпирана“ и западните медиуми кои ги смета за „пропагандна машинерија“.

Иако ЦИА не прецизираше на чија страна учествувал младиот Глос, објавите на социјалните мрежи, како и руските извори, укажуваат дека тој можеби доброволно се приклучил на руската страна.

Во службената белешка стои – „патување низ источна Европа“

Во службената белешка на семејството Глос се наведува дека Мајкл починал „за време на патување низ источна Европа“, без конкретно да се спомнува Украина или воениот конфликт.

Мајкл бил син на Џулијана Галина Глос, висока функционерка во ЦИА, и Лери Глос, воен ветеран од Ирак кој работи на развој на воен софтвер за американската армија и НАТО.

Информациите од медиумите укажуваат дека Мајкл се идентификувал како пацифист, бил активен на протести против забраната за абортус, се борел за правата на жените и за заштита на животната средина. Сепак, по доаѓањето во Русија во 2023 година, неговиот јавен дискурс се менува – на социјалните мрежи објавувал конспиративни теории за Украина и тврдел дека НАТО бил создаден од неонацисти.

Смртта на младиот Глос предизвика бројни реакции и шпекулации – како поради неговото семејно потекло, така и поради неговата трансформација од активист во личност која изразува симпатии кон режим кој неговата земја го смета за закана.

Строг протокол на облекување за погребот на папата Франц: Бисери, црни вратоврски и симболика на боите

За верниците и светските лидери кои денес присуствуваат на погребот на папата Франц, важи прецизен дрес-код што мора строго да се почитува.

За мажите, протоколот наложува темно одело со долга црна вратоврска и црно копче на левиот ревер, додека белата кошула е дозволена. Белата боја, сепак, е строго забранета за жените.

Жените се должни да носат долга црна облека – најчесто фустан – во комбинација со црни ракавици и црн вел преку главата. Единствено, дозволениот накит се бисерите, кои според традицијата симболизираат скромност и почит.

Кога станува збор за високото свештенство, кардиналите ќе бидат облечени во виолетова хорска облека, додека бискупите и другите прелати ќе носат виолетова боја – симбол на жалост и духовно размислување. Самата погребна облека на папата Франц ќе биде во црвено, боја која во христијанската симболика претставува крвта на мачениците и присуството на Светиот Дух.

Погребот на папата ќе се одржи денес во една од петте таканаречени „папски базилики“ – базиликата Санта Марија Маџоре во Рим. Телото на поглаварот на Римокатоличката црква ќе биде пренесено од базиликата Свети Петар.

До овој момент, своето присуство го потврдиле најмалку 130 странски делегации, додека за медиумското покривање на настанот се акредитирани околу 2.700 новинари од целиот свет.

Северна Кореја го претстави новиот воен разорувач: „5.000 тони моќ и партиска лојалност“

Северна Кореја официјално го претстави најновиот адут во својата морнарица – современ разорувач со тежина од 5.000 тони, опремен со напредно вооружување и изграден целосно со домашна технологија. Веста ја објави високиот функционер и секретар на Централниот комитет на Работничката партија на Кореја, Џо Чунг-рјонг.

„Овој воен брод од 5.000 тони е опремен со најмоќното оружје што нашата армија го поседува и беше завршен во рок од само 400 дена, потпирајќи се исклучиво на сопствени сили, ресурси и технологија,“ изјави Чунг-рјонг, истакнувајќи дека проектот е симбол на самодоволноста и одлучноста на Северна Кореја да ја зајакне својата воена моќ на море.

Претседателот Ким Џонг Ун лично им се заблагодари на работниците, инженерите и техничарите кои учествуваа во изградбата на новиот разорувач, потенцирајќи дека нивниот труд е директен одраз на „партиската линија за јакнење на морнарицата и одбранбените капацитети на државата“.

Според државните медиуми, новиот брод ќе одигра клучна улога во одржувањето на одбранбената стабилност во корејските води, особено во контекст на зголемените тензии во регионот и присуството на странски воени сили во близина на полуостровот.

Северна Кореја сè почесто го нагласува својот фокус на развој на модерна воена опрема, при што се истакнуваат морнарицата и ракетната програма како столбови на националната одбрана. Новиот разорувач се опишува како „плод на револуционерната посветеност“ и доказ дека земјата не планира да се откаже од сопствениот пат, без разлика на надворешниот притисок и санкциите.