Суд во Бостон го блокираше укинувањето на специјалниот имиграциски статус за над половина милион луѓе
Судот во Бостон донесе важна одлука со која се стопира планот на администрацијата на американскиот претседател Доналд Трамп за укинување на специјалниот легален статус за над 532.000 имигранти од Куба, Хаити, Венецуела и Никарагва.
Федералната судијка Индира Талвани нареди итна суспензија на укинувањето на програмата, укажувајќи дека владата погрешно го толкувала законот. Таа појасни дека забрзаните процедури за депортација се применуваат на лица кои нелегално влегле во САД, но не и на оние кои се примени преку официјални владини програми.
Овој специјален хуманитарен програм, кој беше воведен од администрацијата на Џо Бајден во 2023 година, им овозможи на државјаните од споменатите земји да престојуваат во САД до две години, поради сериозната состојба со човековите права во нивните матични држави. Програмата дозволуваше влез на до 30.000 лица месечно.
Администрацијата на Трамп, која на крајот од март објави укинување на оваа мерка, тврдеше дека времето за „посебни програми“ е завршено. Без судската интервенција, имигрантите кои пристигнале легално преку програмата ќе беа принудени да ја напуштат земјата до 24 април – точно 30 дена по најавата за нејзино укинување.
Оваа одлука претставува најнова правна пречка за Трамповата реторика и планови за масовни депортации, особено насочени кон имигранти од Латинска Америка. Во рамки на својата предизборна кампања, Трамп вети дека ќе депортира „милиони“ недокументирани имигранти, што повторно ја актуелизира дебатата за имиграциската политика во САД.
