Пакистан тврди дека Индија планира воен напад во следните 36 часа

Исламабад – Пакистанскиот министер за информации, Атаулла Тарар, изјави дека земјата располага со сериозни разузнавачки податоци според кои Индија планира воена акција во рок од 24 до 36 часа. Според Тарар, Индија сака да го искористи неодамнешниот напад во Кашмир како изговор за агресија.

Напнатоста меѓу двете нуклеарни сили повторно е на високо ниво. Минатонеделниот напад во индискиот дел на Кашмир, во кој загинаа 26 лица, дополнително ги влоши односите. Индија директно го обвини Пакистан за нападот, но Исламабад ги отфрла обвинувањата и бара независна меѓународна истрага.

Pakistan has credible intelligence that India intends carrying out military action against Pakistan in the next 24-36 hours on the pretext of baseless and concocted allegations of involvement in the Pahalgam incident.
Indian self assumed hubristic role of Judge, Jury and… pic.twitter.com/WVW6yhxTJ0

— Attaullah Tarar (@TararAttaullah) April 29, 2025

Размена на мерки и обвинувања

По нападот, двете страни презедоа сериозни чекори една против друга. Индија го суспендираше клучниот билатерален договор за вода, додека Пакистан одлучи да го затвори својот воздушен простор за индиските авиони.

Министерот Тарар преку социјалната мрежа X предупреди дека „Пакистан ќе одговори силно на било каква индиска агресија“ и ја предупреди Индија дека ќе сноси одговорност ако ситуацијата во регионот ескалира до точка без враќање.

Од индиската влада засега нема официјална реакција на овие тврдења, но премиерот Нарендра Моди претходно изјави дека оние што стојат зад нападот во Кашмир ќе бидат пронајдени и казнети.

Кашмир – долгогодишно жариште

Ситуацијата дополнително ја комплицира долгогодишниот територијален спор околу Кашмир, регион што и Индија и Пакистан го сметаат за своја територија. Двете земји веќе имаат водено неколку војни поради ова подрачје.

Пакистанскиот министер за одбрана, во одвоено соопштение, изјави дека воен напад од Индија е „многу веројатен“, но додаде дека Пакистан би употребил нуклеарно оружје само ако неговиот национален опстанок е директно загрозен.

Ситуацијата е крајно затегната, а меѓународната заедница со загриженост го следи развојот на настаните, надевајќи се дека нема да дојде до вооружен судир со далекусежни последици.

Моди и дава „целосна слобода“ на војската – Индија на раб на конфликт со Пакистан

По смртоносниот напад во индискиот дел на Кашмир, во кој загинаа 26 цивили, индискиот премиер Нарендра Моди ѝ даде на армијата „оперативна слобода“ да одговори како што смета за соодветно. Ова го потврди владин извор за AFP, пренесе агенцијата Бета.

На состанок со врвниот воен врв, Моди изјавил дека индиските вооружени сили имаат целосна слобода самостојно да одлучат за целите, моментот и начинот на евентуалниот одговор. „Премиерот го потврди ставот дека Индија е решена да нанесе одлучувачки удар врз тероризмот и ја изрази довербата во капацитетите на нашата војска“, изјави неименуваниот извор.

Кашмир повторно во центарот на криза

Нападот се случи на 22 април во Пахалгам – туристички град во Кашмир под индиска администрација. Група вооружени напаѓачи усмрти 26 луѓе, во еден од најкрвавите напади врз цивили во регионот во последните две децении. Иако никој досега не ја презеде одговорноста, Њу Делхи веднаш го обвини Исламабад.

Пакистан остро ги негираше обвинувањата и побара „неутрална меѓународна истрага“. Ситуацијата меѓу двете нуклеарни сили се влоши, со дипломатски санкции од двете страни и повици до граѓаните да се повлечат од територијата на соседната земја.

Размена на оган долж Контролната линија

Последниве неколку ноќи, индиските и пакистанските сили разменуваат оган со лесно вооружување долж Контролната линија – де факто границата што го дели Кашмир помеѓу двете држави. Индија и Пакистан го поделија регионот во 1947 година, веднаш по прогласувањето независност.

Сепак, и двете страни и понатаму имаат територијални претензии врз целата област, која веќе децении претставува точка на постојан конфликт. Од 1989 година, во индискиот дел на Кашмир се води вооружено востание, при што животите ги загубиле десетици илјади луѓе.

Путин со маслинова гранка во едната, со ракети во другата рака: дали Трамп конечно го губи трпението?

Рускиот претседател Владимир Путин продолжува да го тестира трпението на својот американски колега Доналд Трамп, нудејќи наизглед „гестови на мир“, додека руските сили истовремено го продолжуваат гранатирањето на цивилни цели низ Украина. Ова го оценува британскиот историчар и новинар Овен Метјуз во својата колумна за The Telegraph.

„Секојдневно, Русија како да нуди некаков гест на мир. Но, за секоја маслинова гранка што Кремљ ја подава со десната рака, со левата продолжува да удира врз украинските цивили“, пишува Метјуз, додавајќи дека Путин не го сфаќа Трамп сериозно и вешто манипулира со него.

Според него, неодамна прогласеното тридневно примирје по повод воената парада на Црвениот плоштад изгледа како добар потег, но реалноста е поинаква. Само неколку часа пред да биде објавен прекинот на огнот, рускиот министер за надворешни работи Сергеј Лавров објави листа на строги услови за ставање крај на војната. Меѓу нив: официјално признавање на руската контрола врз сите окупирани украински територии и воени ограничувања за Киев.

Метјуз посочува дека и самиот Трамп сè почесто изразува сомнеж дека Путин навистина сака мир – и тоа не само во приватни кругови, туку и јавно. Тој дури и се закани со воведување на секундарни санкции кон Русија, што би можело сериозно да ја загрози нејзината веќе ослабната економија зависна од енергенси.

„Путин треба да ја сфати оваа закана сериозно“, вели Метјуз, потсетувајќи дека падот на цените на нафтата веќе врши притисок врз финансирањето на руската воена машинерија. Според него, целосен американски притисок – како блокада на рускиот извоз на енергенси кон Индија, Кина и ЕУ – би имал разорно влијание врз Кремљ.

Сепак, Метјуз смета дека Путин не верува дека Трамп навистина ќе оди до крај. Наместо тоа, рускиот претседател се обидува да ја искористи, како што ја нарекува, „алчноста на Трамп“, па сè погласно се зборува за заеднички руско-американски енергетски проекти.

„Русија ќе продолжи да го одолговлекува мировниот процес сè додека може“, додава Метјуз. Украина, од своја страна, е подготвена на дипломатски отстапки, но останува цврста во ставот дека нема да го признае Крим како руска територија.

„Моментот на вистината“, како што го нарекува Метјуз, ќе дојде наскоро. Доколку му се верува на Трамп, тој рок е прашање на денови. Или Путин ќе мора да попушти околу Крим, или Трамп ќе мора да ја исполни својата закана и да го смени пристапот – од „добар полицаец“ во „лош“. А трета опција, додава Метјуз, е Трамп едноставно да ја загуби концентрацијата и да се повлече – оставајќи ги другите да ги расчистуваат дипломатските остатоци.