Градоначалникот на општина Битола, Тони Коњановски, денес оствари средба со новиот директор на Фестивалот „Браќа Манаки“, актерот Димитрија Доксевски. На средбата се разговараше за плановите со кои директорот на фестивалот ќе пристапи кон организација на новото фестивалско издание на „Браќа Манаки“. Градоначалникот Коњановски, нагласи дека Општина Битола, продолжува да обезбедува поддршка за овој значаен фестивал за Битола, кој е вистински промотор на градот во светски рамки.

Општина Битола денес достави 59 апликативни формулари за вкупно 36 инфраструктурни проекти до Министерството за локална самоуправа, во рамки на Јавниот повик за финансирање на општини од Потпрограмата АА. Како што истакна градоначалникот Тони Коњановски, апликациите се резултат на подготвена проектна документација за приоритетни проекти со вкупна вредност од над 800 милиони денари.

Предвидените проекти вклучуваат реконструкција на улици, замена на канализациона и водоводна мрежа, изградба на три спортски сали во основни училишта и 10 нови спортски игралишта со осветлување. Во план е и изградба на атлетски патеки и борилиште во стадионот „Петар Милошевски“.

Повикот за аплицирање трае до 30 април, по што министерствата ќе ги објават одобрените проекти.

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е умерен, а на граничните премини од македонска страна нема подолги задржувања за влез и излез од државата.

Како што известува АМСМ, од утре ќе има привремена промена во сообраќајот на делот од државниот пат А2 – делница Желино – Тетово, помеѓу бензинската станица Макпетрол и северниот влез на Тетово. На овој дел од патот ќе се врши геодетско снимање и една сообраќајна лента ќе биде затворена во неколку фази. Работите ќе траат до нивно завршување.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.