Кина воведе царини од 125% и ги стопира нарачките од Боинг – расте трговската тензија со САД
Пекинг донесе одлука за итно запирање на сите идни испораки на авиони од американскиот производител „Боинг“, како одговор на новиот бран американски царини што ги воведе претседателот Доналд Трамп кон кинеската стока. Мерката дополнително го ескалира трговскиот судир меѓу двете економски сили.
Според информации објавени од „Блумберг“, а потврдени и од извори блиски до кинеските власти, освен целосното замрзнување на новите испораки на авиони, издадено е и официјално препорачање до кинеските авио-компании да прекинат со набавка на американска авионска опрема и резервни делови – барем привремено.
Оваа одлука доаѓа веднаш по објавата на Пекинг дека воведува реципрочни царини од 125% на американската стока, вклучувајќи авиони и делови за нив. Со ова, трошоците за увоз на авиони од САД би се удвоиле, што практично ги прави неисплатливи за кинеските превозници.
По објавата на оваа вест, акциите на „Боинг“ паднаа за 4,6%, при што компанијата од почетокот на годината бележи вкупен пад од околу 10%. Од „Боинг“ сѐ уште нема официјален коментар на новонастанатата ситуација.
Кина е еден од клучните и најбрзо растечки пазари за „Боинг“, кој уште во 2018 година испорачуваше речиси четвртина од своето годишно производство токму таму.
