Силен земјотрес во Истанбул: Повредени 236 лица, регистрирани 127 последователни потреси

Во Истанбул денеска, нешто по пладне, беше почувствуван силен земјотрес со јачина од 6,2 степени според Рихтеровата скала, со епицентар во Мраморното Море, во близина на округот Силиври. Според податоците од Управата за справување со катастрофи и вонредни состојби на Турција (АФАД), по главниот потрес следеле дури 127 последователни земјотреси, од кои најсилниот бил со јачина од 5,9 степени.

Министерот за внатрешни работи, Али Јерликаја, потврди дека иако нема загинати, една зграда е срушена во централната општина Фатих, а девет куќи се евакуирани како мерка на претпазливост.

Министерот за здравство, проф. д-р Кемал Мемишоглу, информираше дека 236 лица се повредени, од кои 173 во Истанбул, 24 во Текјрдаг и Сакарија, две во Јалова и три во Бурса. Поголемиот дел од повредите настанале како резултат на скокање од повисоки места поради паника.

„Во град со 16 милиони жители, како што е Истанбул – поголем од 131 држава во светот – добивме нешто над 10.000 повици, што е релативно мал број“, рече Јерликаја, додавајќи дека поголемиот дел од повиците биле информативни или поврзани со загриженост за безбедноста на објектите.

Канцеларијата на гувернерот објави дека за граѓаните кои не се чувствуваат безбедно да се вратат во своите домови, се отворени училишни дворови, спортски сали и џамии како привремени засолништа.

Турската црвена полумесечина активно се вклучи во помошта, обезбедувајќи храна, топли и ладни пијалаци и вода на граѓаните. Претседателката на организацијата, Фатма Мерич Јилмаз, изјави дека над 1.000 вработени и волонтери, како и 65 мобилни кујни, веќе се распоредени низ Истанбул, а план е тој број да се зголеми на 3.000.

Песков: Мировен договор е можен ако Украина се повлече од регионите во состав на Русија

Портпаролот на Кремљ, Дмитриј Песков, изјави дека клучен услов за постигнување мир во Украина е повлекување на украинските трупи од териториите на Донбас и таканаречената Новорусија, кои Русија ги смета за дел од својата територија.

„Ако Украина ги повлече своите трупи од овие четири региони – тогаш, да, мирот е можен“, изјави Песков за францускиот неделник Le Point, одговарајќи на прашање дали постои реална можност за прекин на војната под такви услови.

Песков исто така нагласи дека американскиот претседател Доналд Трамп досега не поставил конкретен рок за прекин на огнот во Украина, нарекувајќи ги таквите идеи „неприфатливи“.

„Трамп никогаш не поставил рокови. А и ние сметаме дека тоа не е соодветно“, изјави Песков, додавајќи дека претседателот Владимир Путин останува отворен за идејата за прекин на огнот. Сепак, според него, мировните разговори за Украина треба да се разгледуваат одвоено од можните преговори за обновување на односите меѓу Москва и Вашингтон.

„Нема решение за конфликтот без нормализација на односите меѓу Русија и САД“, додаде Песков.

Запрашан за ставот на Путин кон Доналд Трамп, Песков одговори дека рускиот претседател има почит кон Трамп, нарекувајќи го „силна политичка и лична фигура“.

Тој откри и дека подготовките за нова средба меѓу Трамп и Путин се веќе во тек, и истакна дека се очекува таквиот состанок да биде продуктивен.

„И двајцата лидери пред сè ги штитат интересите на своите држави, но споделуваат и подготвеност најтешките прашања да ги решаваат преку дијалог“, заклучи Песков.

Украинските вооружени сили денеска соопштија дека извршиле напад врз руски објект за производство на беспилотни летала во градот Јелабуга, над 1.000 километри оддалечен од границата со Украина.

„Познато е дека е оштетена производствената линија за финално склопување на беспилотни летала“, стои во соопштението на украинската армија објавено на Телеграм.

Фабриката, според украинските податоци, има капацитет за производство на 300 дрона дневно.