Првиот вицепремиер и еден од лидерите на ВРЕДИ, Изет Меџити, очекува Алијансата за Албанците (АА), предводена од Арбен Таравари, вечерва конечно да ја донесе одлуката – дали останува дел од коалицијата ВРЕДИ или ќе избере да соработува со ДУИ.
„Да разјасниме меѓу себе дали се дел од ВРЕДИ или одат со ДУИ“, рече Меџити.
Тој потенцира дека очекува АА да одговори во најбрз можен рок.
„Доколку некој сега ја анализира состојбата, единствената можност за враќање на ДУИ во владата е поделбата на ВРЕДИ. За ваквата ситуација допринесоа и кругови од надвор“, додаде тој.
Меџити се осврна и на историјата на поделби кај албанскиот политички блок, нагласувајќи дека тие секогаш резултирале со ослабување на албанскиот политички фактор. Тој истакна дека ВРЕДИ понудила максимум за да ја задржи АА во коалицијата.
„Ја фаворизиравме АА, г. Таравари изјавува по медиумите – ми понудија 35%. Ние до денеска не сме се договориле што ќе земе ДД или другите, туку зборувавме само за фаворизирање на АА со цел ВРЕДИ да остане обединета“, рече Меџити.
Опцијата што Таравари ја најави – дека АА би можела самостојно да излезе на избори – за Меџити е нереална.
„Бидејќи и тие знаат, и ние знаеме. Исто е како јас да кажам дека ќе одам со ДД утре сам, а нема да излезам сам ако немам поддршка од надвор“, изјави тој.
Меџити нагласи дека ВРЕДИ има интерес АА да остане дел од коалицијата.
„Ја сакаме АА во ВРЕДИ, а не АА која за опција ја има ДУИ. Тогаш се губи смислата на промената“, посочи Меџити.
Во заклучок, тој изрази уверување дека без разлика на одлуката на АА, коалицијата ВРЕДИ ќе излезе поконсолидирана од оваа ситуација.
