Република

„Да се дислоцира ѓубрето, не задушуваат“ – протест пред Општина Кичево

Група самоорганизирани граѓани на Кичево денеска излегоа на протест пред зградата на Општината, барајќи итно решавање на проблемот со депонијата што се наоѓа веднаш зад Јавното комунално претпријатие „Комуналец“.

Протестот започна со едноминутно молчење во знак на почит кон жртвите од несреќата во Кочани.

Потоа, организаторите побараа итна дислокација на ѓубрето, истакнувајќи дека депонијата станала извор на неподнослива смрдеа и директна закана по здравјето на граѓаните.

„И покрај тоа што неколку пати институциите ни рекоа дека оваа локација е само привремена, и дека проблемот со отпадот ќе се реши во краток рок – ние и понатаму гледаме дека работата не мрднала од мртва точка. Напротив, количеството на отпад само се зголемува. Бевме сведоци дека ѓубрето неколку пати беше запалено – не знаеме дали намерно или случајно – но знаеме дека пред седум месеци имаше голем пожар и три дена живеевме во чад и неподнослива миризба“, рече еден од организаторите.

Загрижени за своето здравје и за животната средина, граѓаните испратија јасна порака до градоначалникот: да се најде решение – и тоа веднаш.

Протестот помина мирно, но организаторите најавија дека ова не е крај. Нов протест е закажан за за две недели, со порака дека нема да запрат сè додека не се исполнат нивните барања.

Прашан за овој проблем, градоначалникот на Кичево, Фатмир Дехари, за ТВ21 изјави дека управувањето со депониите е наследен проблем од претходните влади, а сегашната локална самоуправа ќе продолжи да го менаџира отпадот на ваков начин сè додека не се изгради регионалната депонија во Ново Село, Битолско.

„Го почитувам гласот на граѓаните и се обидувам да го дадам најдоброто од себе“, изјави Дехари.

Република

Коњановски во работна средба со британскиот амбасадор Лосон во Битола

Градоначалникот на Општина Битола, Тони Коњановски денеска оствари средба со амбасадорот на Обединетото Кралство во Македонија, Метју Лосон, кој ја реализира својата прва официјална посета на Битола.

На состанокот двајцата соговорници ги потврдија одличните билатерални и пријателски односи меѓу двете земји. Коњановски го запозна амбасадорот со развојните потенцијали на Битола, нејзината историска и културна улога, како и економското значење на градот, истакнувајќи дека постои широк простор за продлабочување на соработката.

Во рамки на посетата, Британската амбасада организираше прием во Офицерскиот дом, на кој присуствуваше и градоначалникот Коњановски, продолжувајќи ги разговорите за идни заеднички иницијативи и партнерства.

Република

Проданоски: Прилеп станува дел од модерниот регионален систем за управување со отпад

Градоначалникот на Прилеп, Дејан Проданоски, денеска учествуваше во формирањето на Меѓуопштинскиот одбор за управување со отпад (МОУО), заедно со градоначалници од пелагонискиот и југозападниот регион. Со потпишување на договорот, општините прават важен чекор кон воспоставување координиран, модерен и ефикасен систем за третман на отпад, усогласен со европските стандарди.

Проданоски истакна дека примарната цел е подобрување на квалитетот на услугите, создавање почиста и поздрава животна средина и решавање на долгорочните предизвици со дивите депонии. МОУО ќе обезбеди заедничко регионално делување и современи решенија за граѓаните на Прилеп и Пелагонија.

Настанот беше организиран од Министерството за животна средина и просторно планирање, во соработка со Министерството за локална самоуправа и SALAR International. Проданоски упати благодарност до институциите и партнерите за поддршката, додавајќи дека Општина Прилеп продолжува посветено да работи на унапредување на квалитетот на животот и чистотата во градот.

Република

БУГАРИ УАПСЕНИ ЗА КРАЖБА НА НАРОДНИ НОСИИ ВО ДЕМИР ХИСАР

Тројца бугарски државјани се уапсени вчера во Демир Хисар под сомнение дека украле и незаконски изнесувале делови од македонски народни носии, кои се класифицирани како културно наследство и под посебен режим на заштита.

Полицијата ги привела А.К. (44) и К.К. (48) во патничко возило „фолксваген голф“ со бугарски регистарски таблици, додека В.Г. (50) бил затекнат во комбе „пежо боксер“, исто така со бугарски ознаки. При прегледот на возилата биле пронајдени поголеми количини на делови од народни носии, за кои осомничените не можеле да обезбедат документи за легално потекло.

Етнолог од Музејот во Битола извршил стручна процена и утврдил дека станува збор за автентични македонски традиционални носии, кои според законот не смеат да се продаваат или прометуваат без дозвола од надлежните институции.

Осомничените се задржани во полициска станица, а по целосното документирање на случајот и во координација со јавен обвинител, против нив ќе биде поднесена кривична пријава за кражба и незаконско изнесување културно наследство или природни реткости.

Случајот го отвора прашањето за зачувување на македонското културно наследство и за контрола на прометот со традиционални артефакти, особено во услови кога се бележат обиди за нелегално изнесување во странство.