Република

Коњановски: Асфалтирање на улицата „Бурса“ во финална фаза – нов импулс за стопанството во Битола

Улицата „Бурса“ во Битола добива нов изглед. Градоначалникот Тони Коњановски и советникот Бојан Бојкоски денеска извршија увид во тековните активности за асфалтирање на оваа значајна сообраќајница, која влегува во финална фаза од реализацијата.

Асфалтирањето се одвива на потегот од новопроектираната улица „Индустриски пат“ до „Пивара“, вклучувајќи го и делот кон А.Д. Фабрика за квасец и алкохол, како и Фабриката за шеќер. Проектот опфаќа реконструкција на коловоз во должина од 2418 метри, со вкупна вредност од 37,6 милиони денари, обезбедени преку Светска банка во рамките на програмата за поврзување на локални патишта.

„Со реконструкцијата на улицата ‘Бурса’ решаваме едно долгогодишно барање на стопанствениците од овој дел на градот. Овој инфраструктурен зафат ќе го растовари сообраќајот од тешки товарни возила на улицата ‘Македонски гемиџии’ и ќе овозможи подобри услови за деловно функционирање“, изјави Коњановски.

Градежните работи ќе продолжат и утре, согласно динамиката на изведувачот, а целта е максимално олеснување на индустрискиот и локалниот сообраќај, што директно ќе придонесе за поефикасно стопанско работење во Битола.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.