Кина наскоро ќе го отвори највисокиот мост на светот – инженерско чудо над „пукнатината на земјата“
Кина повторно ја поместува границата на можностите кога станува збор за инфраструктура. Во јуни, во југозападната провинција Гуиџоу, се очекува отворање на највисокиот мост на светот – грандиозен проект над кањонот Хуаџијанг, кој веќе доби прекар „пукнатина во земјата“ поради својата драматична географија.
Овој висечки челичен мост, со вкупна должина од речиси 2.900 метри, ќе се издига на 625 метри над нивото на реката – дури 289 метри повисоко од досегашниот рекордер, францускиот вијадукт Милау.
Од два часа – на само една минута
Иако самата висина го прави мостот атракција, неговата суштинска важност лежи во практичноста. Денешното патување низ кањонот, кое трае речиси два часа, ќе биде сведено на само една минута. Мостот е дел од поширок автопатски проект што ќе го подобри поврзувањето на планинскиот Гуиџоу – регион познат по своите екстремни теренски услови и комплексна инфраструктура.
Изградбата официјално започна на 18 јануари 2022 година, а според изјавата на главниот инженер Џанг Шенглин за China Daily, досега е завршено 95% од проектот. Пуштањето во употреба се очекува во втората половина на 2025 година.
За споредба, само челичната конструкција тежи над 22.000 тони – еквивалентно на три Ајфелови кули.
Кина и понатаму покажува дека не само што гради брзо, туку и амбициозно. Со овој проект, Гуиџоу добива нов симбол, а светот – уште едно архитектонско чудо кое не само што фасцинира, туку и суштински менува животи.
