Руската армија ја нападна Одеса со дронови

Напад со руски дронови врз Одеса: Повредени три лица, оштетени домови и инфраструктура

Во масовен напад со руски беспилотни летала извршен во текот на ноќта врз црноморскиот град Одеса, повредени се три лица, предизвикани се пожари, а сериозно се оштетени стамбени објекти и делови од цивилната инфраструктура, соопштија утрово властите на јужната украинска област.

„Непријателот повторно ја нападна Одеса со масовен напад со дронови“, објави гувернерот на регионот, Олег Кипер, преку порака на Телеграм. Засега не се познати сите детали и размери на нападот.

Украинските воздухопловни сили вообичаено во текот на утрото објавуваат подетални информации за руските ноќни напади.

Пожари и спасувачки операции

Според објава на украинската итна служба, тројцата повредени се згрижени, а како последица од нападот избиле неколку пожари во различни делови на градот.

Градоначалникот на Одеса, Генадиј Труханов, објави фотографии на кои се гледаат урнати згради и други објекти, додека на една од сликите се прикажани спасувачи кои пребаруваат низ урнатините, а куче се провира низ остатоците од разурнат дом.

Обвиненија и кршење на договорот за Црното Море

Новинската агенција Ројтерс напомена дека не може независно да ги потврди информациите од украинските извештаи. Двете страни во конфликтот – Русија и Украина – и понатаму негираат дека намерно таргетираат цивилни цели, иако војната трае повеќе од три години, од почетокот на руската инвазија врз Украина.

Кон крајот на март, САД соопштија дека постигнале одвоени договори со Русија и Украина за прекин на напади над Црното Море и врз енергетски објекти на двете страни.

И покрај договорот, двете страни повеќепати се обвинуваат за прекршување на договорениот мораториум.