Свет

Зеленски и Украина конечно споделија добри вести: Дали ситуацијата започнува да се менува?

Украина и САД на чекор до договор за минерали: Ќе се потпише меморандум во блиска иднина

Украина и Соединетите Американски Држави постигнаа значителен напредок во преговорите за билатерален договор поврзан со минералите, а наскоро се очекува потпишување на меморандум кој ќе го означи првиот конкретен чекор во соработката, изјави украинската вицепремиерка Јулија Свириденко.

Овој договор, кој е дел од пошироката стратегија на американскиот претседател Доналд Трамп за изнаоѓање начин за стабилизирање на ситуацијата и забрзување на крајот на војната во Украина, треба да послужи и како механизам за враќање на дел од милијардите долари што САД досега ги имаат потрошено во форма на воена помош.

Претседателот Зеленски, од своја страна, веќе изјави дека Украина нема намера да ја третира помошта од претходната американска администрација како заем.

„Техничките тимови од двете страни работеа внимателно и веќе се усогласија неколку важни точки во нацрт-договорот“, напиша Свириденко на социјалната мрежа Икс. Таа нагласи дека правните експерти на Украина веќе адаптирале неколку клучни ставки, а процесот продолжува со добра динамика.

Според најавите, предложениот меморандум ќе отвори пат за формализирање на економската соработка, а како што дознава „Блумберг њуз“, САД ја ревидирале проценката на трошоците за украинската помош – од првично проектирани 300 милијарди на околу 100 милијарди долари.

Во фокусот на новиот договор, предложен од администрацијата на Трамп минатиот месец, се наоѓа идејата за заеднички инвестициски фонд. Приходите од експлоатација на минералните ресурси – било од страна на државни или приватни компании – ќе треба да бидат реинвестирани во овој фонд. Договорот не предвидува конкретни безбедносни гаранции за Украина, но се очекува да придонесе за долгорочен економски раст.

Свириденко најави дека договорот, откако ќе биде финализиран, ќе треба да биде ратификуван од украинскиот парламент. „Тоа ќе отвори нови можности за инвестиции и развој во Украина, а истовремено ќе придонесе и за создавање на услови за опиплив економски напредок во двете земји“, истакна таа.

Свет

Пожар го проголта пазарот во Санкт Петербург, има повредени

Голем пожар избувна на пазарот Правобережни во Невскиот округ во Санкт Петербург, зафаќајќи го целиот пазарен комплекс. Снимки од воздух покажуваат дека пламените јазици брзо се прошириле по целата должина на објектот, придружени со густ столб црн чад.

Пожарникарските екипи интервенираат на главниот влез, а според Министерството за вонредни ситуации, до 19:00 часот по локално време огнот се проширил на околу 300 квадратни метри. Настанот е класифициран како ниво два – повисока категорија на опасност. На терен се распоредени шест противпожарни возила и триесет пожарникари.

Според сведоштва на вработени, пожарот започнал на вториот кат, каде прво „нешто почнало да искри“, по што просторот брзо се исполнол со густ чад и луѓето во паника излегле надвор. Очевидци велат дека се слушнале и неколку експлозии.

Општинското обвинителство ги истражува причините за несреќата, а руските медиуми пренесуваат дека две лица се повредени.

Свет

Кина изврши смртна казна врз поранешен директор за корупција

Кина го погуби Баи Тианхуи, поранешниот генерален директор на компанијата „Чајна Хуаронг Интернешнл Холдингс Лтд.“, осуден за примање мито во износ од 156 милиони долари. Егзекуцијата се изврши во градот Тјанџин по одобрување од Врховниот народен суд, јавува државната агенција „Синхуа“.

Со пресудата од мај 2024 година, Баи беше осуден на смрт, му беа одземени политичките права доживотно, а неговиот имот и нелегално стекнати профити беа конфискувани и вратени во државната каса. Врховниот суд го потврди решението на Вишиот народен суд Тјанџин, оценувајќи ги злосторствата на Баи како особено сериозни.

Баи имаше право на средба со своите роднини пред егзекуцијата, а неговата активност за примање мито се однесува на периодот од 2014 до 2018 година, кога незаконски стекнал 1,108 милијарди јуани (приближно 157 милиони долари).

Свет

Голема трагедија во Мароко: Спасувачи трагaат по преживеани под урнатините

Во населбата Ал Мостакбал ал Масира во округот Зуага, Фес, станбени згради се урнаа ноќта помеѓу 9 и 10 декември, при што голем број жители останаа заробени под урнатините, објави мароканската новинска агенција МАП.

Локалните власти ги повикаа граѓаните да се држат подалеку од нестабилни згради и да пријавуваат структурни оштетувања. Спасувачките екипи интензивно работат на расчистување на урнатините во потрага по преживеани, а на социјалните мрежи се појавија видеа од операциите.

Семејствата кои останаа без дом ќе добијат итно сместување и помош, додека загриженоста за безбедноста на постарите работнички населби во Фес повторно се зголеми. Уривањето на дотраени згради не е невообичаено во Мароко, што дополнително ја потенцира потребата од итни реконструкции.