Зеленски ги повика партнерите да ја зголемат помошта за Украина и да извршат притисок врз Русија
Претседателот на Украина, Володимир Зеленски, по денешниот руски напад на Днепар, повика на зголемување на меѓународната помош за Украина и на поголем притисок врз Москва.
„Русија го користи секој ден и секоја ноќ за да убива. Мораме да вршиме притисок на овие убијци и да помогнеме да се заврши овој конфликт и да се гарантира траен мир. Им благодариме на сите партнери кои ги користат своите можности на овој начин. Војните се запираат само со сила, силата против агресорот, силата во одбрана на животите“, изјави Зеленски.
Тој нагласи дека секој одбранбен пакет и секој облик на поддршка од меѓународната заедница за украинскиот отпор “буквално значи заштита на животите”.
„Беше тешка ноќ во Днепар. Руски дронови удрија во обични згради и цивилна инфраструктура. Во тек е чистењето на урнатините. Во болниците се 16 повредени лица, а вкупно 28 лица се повредени, меѓу кои и четири деца. Сите добиваат помош. За жал, три лица загинаа во рускиот напад, меѓу кои и 17-годишната девојка Верника… изразувам сочувство на нејзиното семејство и пријатели“, напиша Зеленски на Телеграм.
Во масовниот напад со беспилотни летала врз Днепар, три лица загинаа, а повеќе од 30 се повредени.
Во нападот беше оштетена образовна институција, студентски дом, гимназија, прехранбена компанија, пошта, печатница, управна зграда, продавници и околу десетина автомобили.
