Македонија

Мицкоски во Дубаи ги презентираше можностите за инвестиции во Македонија

Од средби со највисоките претставници на државно ниво, до состаноци со најголемите енергетски, градежни и земјоделски компании во Обединетите Арапски Емирати. Македонската делегација ја искористи можноста да ги презентира условите за инвестирање во земјава пред бизнис секторот во Дубаи и Абу Даби. Премерот Мицкоски кој го предводи владиниот тим во Емиратите информира дека имал успешни средби со директорите на Eagle Hills, приватна компанија за инвестирање и развој во недвижнини со седиште во Абу Даби, која веќе е присутна со инвестиции во Албанија, Унгарија и Србија. Меѓу бројните состаноци го издвојува и оној со развојниот холдинг Абу Даби кој од 2023 година е меѓу 10-те најдобри светски суверени фондови по обем на инвестиции. Владиниот тим сесретнал и со извршниот директор на Масдар Енерџи Инвестмент Компани, една од најголемите светски инвеститори во обновлива енергија и двигатели на енергетската транзиција.

„Масдар е пионер во чистата енергија, позиционирајќи ги ОАЕ на чело на светската енергетска транзиција. Масдар е присутна и поддржува повеќе од 40 земји во нивната енергетска транзиција. Со сите овие компании разговарав за проекти, можности и планови за инвестирање во Македонија која како држава доцни во лобирањето да се најдеме на инвестициската мапа на овие светски економски гиганти. Даваме се за да обезбедиме иднина и просперитет за нашите граѓани. Ги претставив можностите за инвестирање во Македонија и нашите напори да се најдеме на мапата на светските инвеститори“ – вели Христијан Мицкоски, претседател на Влада.

Мицкоски вели дека по подолга пауза во односите со Емиратите, сега посетата ја оценува со највисока оценка на економски и политички план. Со стопанските комори на Дубаи и Шарџа било разговарано за проекти од областа на транспортот, пред сè коридорите 8 и коридорот 10 и отсечката на коридорот 10, 10-д. Биле презентирани туристичките можности на Охрид и Попова Шапка. Се зборувало и з аинвестиции во градежништвото, земјоделството и енергетиката. Како главен приоритет тоа буиле истакнати проектите, односно хидроцентралите на Река Црна, Чебрен и Галиште, како и нови соларни панели, нови ветерни турбини, ветерни паркови.

Вчера Вицепремиерот и министер за транспорт Александар Николоски и министерот з анадворешни работи Тимчо Муцунски се сретнаа со челниците на „Мубадала“, инвестициска компанија од Обединетите Арапски Емирати. Муцунски рече дека во наредните неколку дена Владата ќе објави една позитивна вест која ќе значи многу за граѓаните на државата, за економијата, за трговијата и туризмот. Тој смета дека посетата на Емиратите била многу продуктивна и дека ловот во потрага по арапски инвестиции ќе биде успешен.

Според Вицепремиерот Николоски, македонските извозни компании можат да ја користат помошта и логистиката што ја нуди Владата на Емиратите, за да освојат нови пазари и да ги пласираат своите производи на Истокот. Од друга страна, тамошните компании можат да ја искористат местоположбата на Македонија за да имаат полесен пристап до пазарите во Централна Европа. Владиниот тим денеска ја завршува четиридневната посета на Обединетите Арапски Емирати.

Македонија

Свечено отворен Лекторат по македонски јазик на Универзитетот „Константин Филозоф“ во Нитра

На 8 декември 2025 година, токму на празникот Свети Климент, беше означен почетокот на ново значајно поглавје во афирмацијата на македонскиот јазик и културата во Европа. На Филозофскиот факултет при Универзитетот „Константин Филозоф“ во Нитра, Словачка, беше свечено отворен Лекторатот по македонски јазик – дванаесеттиот лекторат што Меѓународниот семинар за македонски јазик, литература и култура при УКИМ го воспоставува надвор од државата.

На отворањето присуствуваше делегација од Универзитетот „Св. Кирил и Методиј“ составена од проф. д-р Владимир Мартиновски, декан на Филолошкиот факултет „Блаже Конески“, проф. д-р Кристина Николовска, директор на МСМЈЛК, и проф. д-р Звонко Танески – кој е назначен за лектор.

Проф. д-р Танески, со својата долгогодишна научна, преведувачка и културна работа во Словачка, одамна има изградено силни врски меѓу македонската и словачката културна средина. Неговото назначување за лектор претставува природно продолжение на оваа меѓукултурна мисија.

Отворањето на Лекторатот е важен исчекор за поголема видливост и промоција на македонскиот јазик, литература и култура во централноевропскиот академски простор. Истовремено, тоа значи и нов импулс за зајакнување на македонско-словачките академски врски и за проширување на нивната иднина.

Фото: Универзитет Св. Кирил и Методиј Скопје

Македонија

Проблеми со „Безбеден град“ за возачите на лизинг возила

Казните што ги регистрира системот „Безбеден град“ кај возилата со црвени таблици најчесто завршуваат во лизинг компаниите наместо кај возачите, бидејќи тие се водат како официјални сопственици на автомобилите. Од повеќе лизинг куќи потврдуваат дека токму кај нив паѓа целиот административен товар и обврската да го идентификуваат вистинскиот прекршител.

Кога камерите ќе снимат прекршок – пребрзо возење, минување на црвено или друг сообраќаен пропуст – системот автоматски ја генерира казната на името на сопственикот на возилото. Кај лизинг автомобилите, тоа речиси секогаш е компанијата, а не лицето кое навистина било зад воланот во моментот на прекршокот.

Од фирмите велат дека мора постојано да ги следат казните, да ги контактираат клиентите и да прибираат податоци за тоа кој го управувал возилото, што го усложнува процесот и често предизвикува доцнења. Во меѓувреме, може да се промаши и рокот од осум дена за плаќање половина од изречената глоба.

Од МВР засега не најавуваат промени, оценувајќи дека системот функционира согласно закон – казната оди на името на формалниот сопственик, кој понатаму е должен да го пријави вистинскиот возач.

Лизинг компаниите, пак, инсистираат на појасни решенија и законски измени, со кои прекршоците регистрирани преку „Безбеден град“ побрзо би се пренасочувале до лицето што реално го сторило прекршокот.

Македонија

Проблеми со казните откриени при тестирањето на новите црвени таблички преку „Сејф сити“

Во директно телевизиско гостување, директорот на Службата за општи и заеднички работи на Владата (СОЗР), Ивица Томовски, фрли светлина врз задкулисните детали за новите, впечатливо црвени регистарски таблички на службените возила.

Томовски обелодени дека црвените таблички биле ставени на „жежок тест“ пред да бидат официјално пуштени во употреба, и тоа преку моќниот систем за видео-надзор „Сејф сити“ (Безбеден град)! По успешното „снимање“ на пробната фаза, најави Томовски, започнала и нивната изработка.

Но, токму тестирањето го извади на виделина неправилниот дел на системот, откривајќи неверојатен логистички прекршок. Имено, прекршочните пораки од „Безбеден град“ не стигнуваат директно до Владата, туку – до лизинг-компаниите од кои се набавени возилата!

„Тоа значи дека дел од казните, како на филмска лента, прво се слеваат кај нив, а потоа се пренасочуваат до СОЗР!“ – констатира Томовски.

Директорот Томовски е дециден: „Сметам дека треба да плаќа оној што го направил прекршокот, а не компанијата!“

Поради овој проблем кој ја комплицира наплатата, Томовски најави дека Владата итнo разгледува можни законски измени со цел да се стави крај на оваа бирократска патека на парите.

А што е со најавената идеја за инсталирање на ГПС-уреди за сателитско следење во службените возила?

Томовски сепак вели дека конечната одлука за оваа контроверзна мерка ќе зависи исклучиво од анализата на резултатите од „Сејф сити“ и реалните потреби на институциите.

„Ќе почекаме да видиме дали тоа навистина ќе биде неопходно“, заклучи Томовски, оставајќи ја можноста за тотална контрола отворена.