Велика Сабота – време за тивка подготовка и длабока симболика
Иако некои Велика Сабота ја доживуваат како обичен ден сè додека се наоѓаат во црква, овој ден всушност има посебна тежина – тоа е време на последни подготовки пред најголемиот христијански празник, Воскресението Христово.
Во домовите се чисти, се готви, се подготвуваат традиционални јадења, а атмосферата е исполнета со тишина, смиреност и духовно исчекување. Според народната традиција, Велика Сабота е ден и на обичаи. Во Мариово, на пример, жените ги переле појасите со верување дека така ќе се заштитат од болки во половината за време на копањето и жетвата.
Вечерта, околу полноќ, верниците се собираат во црквите. Секој носи црвено јајце, а во некои краишта, како Радовиш, и свеќа со зелено гранче или цвеќе. Свеќата ја палат од свештеникот и ја носат дома, каде што со неа го палат домашниот оган – симбол на живот и благослов.
На полноќ, со тропарот „Христос воскресе“, верниците трипати ја обиколуваат црквата. Потоа следува литургијата, причестувањето и симболичното кршење со црвените јајца – обичај што го означува крајот на постот и почетокот на радоста.
Интересно е и тоа што малите деца, според традицијата, навечер добиваат црвено јајце ставено под перница, кое им се дава утредента – на Воскресение, кога заедно со родителите одат на црковна служба.
