Магазин

Колку навистина ќе ве чини реновирањето на бањата?

Повеќето сопственици на станови и куќи го одложуваат реновирањето на бањата се додека не дојде до сериозни дефекти или кога ќе одлучат да го продадат/издадат имотот. Причината лежи во фактот што реновирањето на бањата е тежок и нималку евтин процес. Во продолжение дознајте колку навистина ќе ве чини реновирањето на бањата и кои се работи се вклучени во реновирањето?

Со реновирање ќе ја подобрите функционалноста и естетиката на бањата. Ќе го оптимизирате постоечкиот простор со подобар распоред, ќе ги замените дотраените инсталации, ќе ги отстраните видливите оштетувања и ќе го подобрите изгледот на бањата.

Реновирањето на бањата е добар начин да ја зголемите пазарната вредност на вашиот имот. Имено, ништо не ги одбива потенцијалните купувачи како дотраена, неуредна бања, бидејќи знаат дека поправката ќе бара големи материјални инвестиции. Интересно е да се забележи дека, според експертите, состојбата на бањата има влијание од 5-10% врз вкупната вредност на имотот.

Но, колку ќе ве чини сето ова? Платформата Daibau, каде што се регистриран над 150 компании за реновирање бањи, спроведе истражување меѓу нив за да даде одговор на прашањето што сите ги интересира – колку навистина ќе ве чини да ја реновирате бањата?

Демонтажа на постоечки елементи и плочки

Овој чекор е неопходен за да дојдете до водоводот, но и доколку сакате да ги смените постоечките плочки и да ја замените санитарната опрема – лабавата, тоалетна шолја, туш кабина/када. Ова е идеална можност за замена на кадата со туш кабина и обратно.

Вадењето плочките и санитарија ќе предизвика многу бучава, па ако живеете во зграда, известете ги соседите за работата. Трошоци за демонтирање на мијалници, ормани и слично и носење на депонија чини околу 15 евра по елемент. Отстранување на кадата или тушот и носење на депонија чини 35 евра и отстранување на керамичките плочки и отстранување на шут до депонијата околу 6 евра/м2.

Нови водоводни и електрични инсталации

Една од основните работи при реновирање на бања е замена на дотраен водовод. Само така вашата бања ќе ве служи долги години по реновирањето, без никакви проблеми. Зошто замената на водоводот е толку важна? Бидејќи дефектите предизвикуваат голема материјална штета: поплави кои ги оштетуваат подните облоги, ѕидовите, гниење на мебелот за бања, ширење на мувла. Проблемот со водоводот може да предизвика штета и на вашите соседи ако живеете во стан, како и во соседните соби.

Поставувањето на нови цевки, вентили и сифони се врши по однапред утврден план. Ова е работа која бара вештина, искуство и соодветни алатки, а потребно е да контактирате и водоинсталатер. Преуредување на водоводни инсталации, заедно со материјалот би чинело околу 500 евраза помала бања.

Кога водоинсталатерот ќе ја заврши работата, тогаш доаѓа електричарот кој по потреба треба да ги замени инсталациите за бојлерот, машината за перење, да постави дополнителни штекери или осветлување. Електричарите треба да ги проверат жиците за време на реновирањето на бањата, заради безбедност. Просечни трошоци за електро инсталација се околу 15 евра/м2.

Хидроизолација

Покрај замената на водоводот, хидроизолацијата е една од најважните работи за време на реновирањето на бањата. Хидроизолацијата ја штити бањата од пенетрација на вода низ плочките и ѕидовите. Оваа работа ја вршат или водоинсталатери или керамичари, како што ќе се договорите.

Мајсторите поставуваат хидроизолација на добро подготвена, рамна површина, обично во два слоја, посветувајќи посебно внимание на подните и ѕидните споеви. Поставување хидроизолација во два слоја, со брзосушечка хидроизолациона маса изнесува околу 4 евра/м2, додека изработка на ѕидна хидроизолација со еднокомпонентна маса со брзо сушење изнесува околу 5 евра/м2.

Поставување плочки и белење

На ред доаѓа поставување на плочки, односно керамички работи. Плочки може да залепите само на подот, што е најевтината опција, до половина од ѕидот, што е практично, но донекаде застарен метот и до таванот, што е најскап, но најдобар избор. Бањата со плочки од подот до таванот успешно ќе го издржи тестот на времето и е лесна за одржување.

Можете да изберете плочки со различни големини (плочките со голем формат се актуелни), форма и дизајн, со фуги во иста или различна боја. Доколку имате мала бања, изберете светли плочки бидејќи тие визуелно го зголемуваат просторот и го прават бигорот помалку видлив.

За лепење плочки со стандардни димензии на подготвената подлога мајстор за плочки, за работна рака ќе ви наплати од 10-16 евра/м2. Цената на плочки со среден квалитет, со различни димензии е помеѓу 4 и 12 ЕУР/м2.

Делови од бањата кои не се обложени со плочки, претежно таванот, потребно е да се избелат.

Поставување санитарија

Потоа следува „козметичката“ работа – набавка и монтажа на нова санитарна опрема – туш кабина, када, мијалник, тоалетна шолја. При поставување на санитарната опрема потребно е просторот помеѓу санитарната опрема и ѕидот/подот да се запечати со висококвалитетен силикон, за да се спречи навлегување на вода и појава на мувла.

Монтажа на када ќе ве чини околу 60 евра, приближно колку и туш кабина, монтажа на ВЦ шолја околу 30 евра, мијалник 40-тина евра. Тука е и мебелот за бања – монтажа на ормани за бања чини околу 30 евра.

Бидејќи реновирањето на бањата е процес кој бара ангажман на различни мајстори, договарање термини со сите нив, размислете за реновирање на бањата по принципот „клуч на рака“. Голем број компании за реновирање бањи ја нудат оваа услуга, така што нема да морате да се грижите за координирање на работата на мајсторот или да барате мајстори поединечно. Конкретно, реновирање бања, каде што е вклучена замена на керамика, инсталации и санитарна опрема, се движи околу 600 евра по м2.

Магазин

Таткото на Еми Вајнхаус, Мич Вајнхаус, поднел тужба против двете најблиски пријателки на починатата пејачка.

Според новите информации од магазинот People, Мич Вајнхаус тврди дека Катрилона Горлеј и Наоми Пери, која со години беше нејзина стилистка и доверлива личност – тајно продавале парчиња облека што ѝ припаѓале на Ејми, и тоа на аукции во САД.

Првата аукција се одржала во 2021 година, а втора во 2023 и двете во организација на „Julien’s Auctions“. Оделото што Ејми го носеше на сцена, фустани од турнеи, лични модни додатоци… сите овие предмети завршиле под чекан, но наводно под имињата на Пери и Горлеј.

Според тужбата, двете пријателки тврделе дека добиле дел од облеката како подарок од самата Ејми додека била жива. Но таткото Мич не се согласува – тој смета дека тие неправедно профитирале од личните работи на неговата ќерка и бара правдата да излезе на виделина.

Потсетуваме, Ејми Вајнхаус почина трагично во 2011 година, на само 27 години, а нејзиниот стил и музика сè уште се инспирација за милиони фанови.

Останува да видиме како ќе заврши овој судски процес – и дали семејството на Ејми конечно ќе стави точка на уште една контроверзија околу нејзиното наследство.

Магазин

Ајде сите да гласаме за македонскиот филм „Приказната за Силјан“ кој е во трка за престижна Audience Choice награда

Документарниот филм на Тамара Котевска, „Приказната за Силјан“, се наоѓа во конкуренција за Cinema Eye Honors Audience Choice Prize, едно од највлијателните интернационални признанија за документарно кино. Филмот веќе ја обезбеди номинацијата во првиот круг на гласањето, а вториот круг започна денес, со публиката како клучен фактор за изборот на победникот.

„Приказната за Силјан“ се натпреварува со силни филмови од Бразил, Палестина, Гана, Нов Зеланд, Украина и други земји. Тимот на Котевска апелира до публиката да ја поддржи Македонија и да ги даде своите гласови за овој филм, истакнувајќи дека секој глас може да има значително влијание врз неговата иднина на светската сцена.

Audience Choice Prize го избира документарниот филм кој најмногу ја освојува светската публика и често претставува предвесник за влез во потесниот избор за Оскар. Гласањето се затвора на 16 декември 2025 во 02:00 часот, а резултатите за тоа дали филмот ќе влезе во потесната листа за Оскари ќе бидат објавени истата вечер во 22:00 часот од страна на Американската Академија за подвижни слики, уметност и наука.

За да се поддржи македонскиот претставник, гласовите можат да се дадат преку следниот линк: Cinema Eye Honors Audience Choice Voting.

Магазин

Зимскиот притисок на гумите е клучен за безбедност на патот

Со доаѓањето на студените месеци, многумина возачи се фокусираат на замена на зимски гуми, но забораваат на еден од најважните аспекти – правилниот притисок во гумите. На ниски температури, воздухот во гумите се стеснува, што значително го намалува притисокот и влијае на стабилноста, сопирањето и потрошувачката на гориво.

За секои 10 степени пад на температурата, притисокот во гумите паѓа за околу 0,1 до 0,2 бари. На пример, ако есенскиот притисок бил 2,2 бари, при -5 степени истиот може да падне на 1,8–2,0 бари, што ја прави гумата помека и помалку стабилна.

Експертите советуваат во зима да се додава околу 0,2 бари над препорачаната вредност наведена од производителот на возилото. На пример, ако препораката е 2,2 бари, зимскиот притисок треба да биде околу 2,4 бари.

Пренискиот притисок води до полошо држење на патот, подолго растојание на запирање, зголемена потрошувачка на гориво и побрзо трошење на гумите, додека пренадуваните гуми ја намалуваат контактната површина и го зголемуваат ризикот од лизгање.

Стручњаците препорачуваат притисокот да се проверува најмалку еднаш месечно, а најдобро е кога гумите се ладни – три часа по возење или кратко по неколку километри. Со правилно надуени гуми, автомобилот ќе биде постабилен, побезбеден и поефикасен во зимски услови.