Скопје

Висар Ганиу: Структурите на Алијансата разочарани од Таравари, враќањето кај ДУИ е неразбирливо

Градоначалникот на Општина Чаир и претставник на коалицијата ВЛЕН, Висар Ганиу, во интервју за вестите на Алсат М изјави дека веќе нема официјална комуникација со Арбен Таравари и неговата група во рамките на Алијансата за Албанците, оценувајќи го нивното враќање кај ДУИ како неразумен и разочарувачки потег.

„Немаме официјална комуникација со г. Таравари. Понекогаш се јавуваат, бидејќи имаме наши луѓе и таму, и според информациите што ги добиваме од структурите – од луѓе кои се калени и ја имаат основано Алијансата за Албанците или изградиле идеологија спротивна на ДУИ – тие се многу разочарани,“ изјави Ганиу.

Тој додаде дека е невозможно рационално да се објасни што се случува со Таравари и неговите политички соработници: „Ние не можеме ниту да замислиме, ниту рационално да објасниме што се случува со Таравари и неговата група во Алијансата за Албанците, бидејќи нема ни една година откако се повлекоа од коалицијата со ДУИ, знаете со каков наратив – дека се корумпирани – а по една година се редат или прават коалиција со партија чии функционери талкаат по судови и затвори поради екстремен корупциски криминал, и партија која е негратирана од меѓународната заедница.“

Ганиу оцени дека овој потег не е во согласност со принципите што претходно ги следеше Алијансата за Албанците и претставува сигнал за силен пресврт кој ја разочара и самата база на партијата.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.