Спорт

Битола со нова ракометна историја, младинците на Еурофарм Пелистер ќе играат на Ф4 во ЛШ во Келн за европска титула

Динамо Букурешт – Еурофарм Пелистер 36:37 (младинци)

-Алем Хаџиќ со 26 гола е најдобар стрелец и прогласен за најкорисен ракометар на турнирот (МВП), а Алем Хаџиќ, Леонид Лозановски и Јован Марковски се најдоа во идеалниот тим.Спортска сала „Динамо Арена“ – Букурешт, гледачи: 1.000
Судии: Стилинос Гкоктас и Ахилес Сачиноглу

Динамо Букурешт: Матеи, Сурлан, Станчиу 11, Думитру 11, Негрила 7, Балу 4, Поенару 1, Кофару 1, Солаци 1, Крачиун, Пушкаш, Симион, Попеску, Јилмаз, Кобинца, Бучуриц

Еурофарм Пелистер: М. Фехми, Ат. Трсунов, Хаџиќ 12, Буторац 6, Марковски 5, Лозановски 4, Ар. Трсунов 3, С. Георгиевски 2, Л. Георгиевски 2, Велевски 2, Симоновски 1, Лазаревски, Трајчевски, Спировски, А. Фехми, Ѓорѓиев.

Младинскиот тим на Еурофарм Пелистер од Битола вечерва го победи и домаќинот Динамо Букурешт со резултат 36:37 и се пласираа на „фајнал-фор“ турнирот во Келн во Лигата на шампионите. Младинците одиграа одличен натпревар во Букурешт, забележаа втора победа и се пласираа меѓу четирите најдобри во Европа во младинскиот ракомет.

Одлучувачкиот натпревар “пелистерци“ добро го отворија и имаа 3:2, а потоа беше 4:4. Хаџиќ постигна четири гола за 5:8, а потоа младите одржуваа позитива, а имаа 6:10.

Динамо дојде до гол дефицит 11:12, но следуваше нова серија на Еурофарм Пелистер 1:6 и на одмор се замина со 12:18.

И второто полувреме започна со добра игра на нашите момчиња. По осмаата минута “пелистерци“ имаа неколку исклучувања и Динамо успеа да се врати во натпреварот и намали на 21:23. Повторно Хаџиќ и Велевски погодија, а следуваше игра во која екипите се менуваа во водството.

Пелистер одбрани два напади и погодуваа за 28:30. Динамо во 55. минута израмни, 33:33. Во 58. минута голманот Мелин Фехми одбрани, но повторно беше 36:36.

По тајм-аутот за Еурофарм Пелистер, во последата минута во пасивен напад Хаџиќ погоди за 36:37 на половина минута до крајот. Потоа Пелистер се одбрани, а романците немаа време за гол.

Тимот на Еурофарм Пелистер го водеа тренерите Фарух Мемиќ и Кире Неделковски.

Извор: BitolaNews

Спорт

Гоце Седлоски е нов селектор на македонската репрезентација

Управниот одбор на Фудбалската федерација на Македонија (ФФМ) на денешната седница донесе одлука за избор на нов селектор на македонската А репрезентација. За нов селектор е именуван Гоце Седлоски.

Членовите на највисокото тело на ФФМ, одлуката за избор на нов селектор на македонската А репрезентација ја донесоа по предлог на Комисијата за избор на селектор, составена од Масар Омерагиќ – претседател на ФФМ, Горан Пандев – директор на Национални репрезентации, Николче Новески – раководител на Скаутинг службата на ФФМ, Агим Ибраими – член на Управниот одбор на ФФМ и Марјан Стојковски – потпретседател на ФФМ.

Гоце Седлоски е едно од најпрепознатливите имиња во историјата на македонскиот фудбал. Како фудбалер, поранешниот репрезентативен капитен оствари 100 настапи и постигна 8 голови за националниот тим, со што останува првиот македонски фудбалер кој запишал 100 настапи за репрезентацијата.

Седлоски има и претходно искуство во стручниот штаб на националниот тим. Во август 2012 година ја водеше македонската А репрезентација како в.д. селектор на пријателскиот натпревар против Литванија во Скопје (1:0).

Во својата тренерска кариера, Гоце Седлоски работеше како асистент и в.д. селектор на Македонија, а на клупско ниво ги предводеше Хоризонт Турново, Вардар, Рига (Летонија), Широки Бријег (Босна и Херцеговина), вториот тим на Динамо Загреб (Хрватска), Шкупи, Влазниа (Албанија) и Работнички.

Во досегашната тренерска кариера, Седлоски освои три шампионски титули, со ФК Вардар во сезоните 2015/16 и 2016/17, со ФК Шкупи во сезоната 2021/22, како и Куп титула со ФК Вардар во сезоната 2024/25.

Како фудбалер, имаше богата кариера настапувајќи за повеќе клубови во Македонија и странство. Своите професионални чекори ги започна во Братство Горно Коњари и Питу Гули Крушево, по што настапуваше за Победа Прилеп, каде го привлече вниманието со своите настапи. Кариерата ја продолжи во Хајдук Сплит и Динамо Загреб во Хрватска. Седлоски, воедно е прв странец кој ја носел капитенската лента на Динамо Загреб. Потоа настапуваше за Шефилд Венздеј во Англија. Интернационалното искуство го надополни со настапи во Вегалта Сендаи (Јапонија), Дијарбакирспор (Турција) и Матерсбург (Австрија), градејќи респектабилна фудбалска кариера.

Фудбалската федерација на Македонија верува дека искуството, авторитетот и длабокото познавање на македонскиот фудбал на Гоце Седлоски ќе придонесат за стабилност, континуитет и напредок на националниот тим во претстојниот период.

Официјалната промоција на Гоце Седлоски за селектор на македонската А репрезентација е закажана за утре (вторник), со почеток во 11:30 часот, во хотел „Хилтон“ во Скопје.

Спорт

Астон Вила го преслуша Манчестер Јунајтед на „Вила Парк“

Aston Villa оствари значајна победа од 2:1 против Manchester United во натпревар од 17. коло во Premier League, одигран на „Вила Парк“.

Домашниот тим поведе пред крајот на првото полувреме кога Морган Роџерс погоди во 45. минута, по асистенција на Мекгин. „Црвените ѓаволи“ возвратија во судиското продолжение од првиот дел, кога Матеус Куња израмни на 1:1.

Во второто полувреме, Вила повторно ја презеде иницијативата, а повторно стрелец беше Роџерс, кој во 58. минута го постигна победничкиот гол по додавање од Оли Воткинс. До крајот на мечот Манчестер Јунајтед не успеа да се врати во игра, иако се обиде со неколку измени и офанзивен притисок.

Гостите добија и две жолти картони, на Угарте и Далот, што дополнително го отежна нивниот обид за пресврт.

Со оваа победа, Астон Вила продолжува со добрата форма на домашен терен и останува во чекор со екипите од горниот дел на табелата, додека Манчестер Јунајтед запиша уште еден неуспех во борбата за стабилност сезонава.

Спорт

Македонија стана полноправна членка на Медитеранската ракометна конфедерација

Македонската ракометна федерација (РФМ) денеска објави дека нашата земја е примена како полноправна членка на Медитеранската ракометна конфедерација. Досега Македонија имаше статус на придружна членка.

Одлуката беше донесена на седмиот конгрес на Медитеранската конфедерација, кој се одржа во рамките на изборниот конгрес на Меѓународната ракометна федерација во Каиро, Египет.

Следната година македонските ракометарки и ракометари ќе имаат активна улога на меѓународната сцена. Пионерките ќе учествуваат на Медитеранскиот шампионат во февруари во Приштина, додека кадетите ќе настапат во април во Словачка. Сениорите ќе се борат за медалите на Медитеранските игри во август во италијанскиот град Таранто.