Научниците предупредуваат: Зголемениот крвен притисок сè почесто резултат на модерниот начин на живот
Научниците алармираат на сè почестиот пораст на хипертензија во светот, поврзувајќи го со стареењето на популацијата и зголемената изложеност на фактори на ризик поврзани со начин на живот.
Истражувачки тим од Канада препорачува внесување на повеќе храна богата со калиум – како банани и брокула – како ефективна стратегија за контрола на високиот крвен притисок. Професорката Анита Лејтон од Универзитетот во Ватерлоу објаснува дека „додавањето храна со висок процент на калиум може да има посилен позитивен ефект врз притисокот отколку едноставното намалување на солта во исхраната“.
Бананата, која е една од најконсумираните плодови во светот заедно со доматот, се смета за идеален избор не само поради енергетската вредност туку и поради содржината на калиум – клучен минерал кој помага при регулирање на крвниот притисок.
Главната авторка на студијата, д-р Мелиса Штат, истакнува дека нашиот организам еволуирал со исхрана богата со калиум и сиромашна со натриум. „Нашите предци консумирале големи количества овошје и зеленчук, што значи дека нашите тела најдобро функционираат со таков тип на исхрана“, вели таа.
Од друга страна, современата западна исхрана е преполна со сол и сиромашна со калиум, што, според истражувачите, го објаснува фактот зошто хипертензијата е позастапена во индустријализираните земји отколку во изолирани заедници.
Ризиците од преработена и солена храна
Зголемената консумација на солена, преработена храна придонесе за експанзија на болестите на модерниот начин на живот – вклучително и дијабетес, срцеви болести и проблеми со бубрезите. Комбинирано со седечкиот начин на живот и се помалата физичка активност, овие навики водат кон сè поголема појава на високи вредности на крвниот притисок.
Денес, според проценките, околу 30 проценти од возрасната популација во светот живее со хипертензија. Со тоа, расте и бројот на случаи со мозочни удари и заболувања на бубрезите, предупредуваат научниците.
„Во последните неколку години, забележуваме драматичен раст на хипертензија на глобално ниво“, се вели во извештајот. Научниците го поврзуваат овој тренд со стареењето на светската популација, намалената физичка активност и доминацијата на западниот начин на исхрана.
