Украина и Јапонија потпишаа кредитен договор вреден три милијарди долари
Украина и Јапонија склучија договор за доделување на кредит во износ до 471,9 милијарди јапонски јени (околу 3 милијарди американски долари), соопшти украинското Министерство за финансии. Средствата ќе бидат отплатени од приходите остварени од замрзнатиот руски државен имот.
Според соопштението, министерот за финансии на Украина, Сергеј Марченко, и амбасадорот на Јапонија во Украина, Масаши Накагоме, го потпишале договорот, кој е дел од глобалната иницијатива на Г7 за итно зголемување на финансиската поддршка за Украина (ERA), вредна околу 50 милијарди долари.
Кредитот е со рок на отплата од 30 години и е наменет за поддршка на клучните буџетски потреби, како и за обновата и развојот на Украина.
Марченко се заблагодари на Владата и народот на Јапонија за „критично важната поддршка“, истакнувајќи дека Токио ѝ има доделено на Украина повеќе од 8,5 милијарди долари од почетокот на руската инвазија.
Иницијативата ERA предвидува користење на замрзнатите руски средства за обезбедување долгорочно финансирање на Украина. Европската Унија ќе учествува со 20 милијарди долари во рамки на оваа програма.
Во декември 2024, Украина потпиша договор со ЕУ за воспоставување на Механизам за соработка во кредитирањето (ULCM), што овозможува користење на средствата од замрзнатиот руски имот за отплата на кредити до 45 милијарди евра.
Истата година, Украина доби и милијарда долари помош од САД во рамки на истиот механизам.
