Трагедија на патот кај Миравци: Загина 19-годишно момче
Утрово, околу 4 часот, животот го загуби 19-годишно момче од село Миравци, откако со своето возило „БМВ“ излетало од коловозот на регионалниот пат меѓу селата Миравци и Давидово. Од Секторот за внатрешни работи – Струмица потврдија дека несреќата се случила во раните утрински часови, а возачот починал на самото место.
Смртта ја констатирал лекар од Итната медицинска помош, кој пристигнал на местото по пријава за несреќата.
На терен излегоа јавен обвинител и увидна екипа од ОВР – Гевгелија, кои извршија комплетен увид. По наредба на јавен обвинител, телото на починатиот е предадено на обдукција.
Се очекува истрагата да ги утврди причините за трагичната несреќа.
