Нови крвави напади во централна Нигерија – најмалку 17 загинати
Најмалку 17 лица загинаа во најновиот бран насилства што ги потресоа заедниците во централниот дел на Нигерија, откако сточари извршија вооружени напади, соопшти локалната полиција.
Инцидентите доаѓаат само два дена по нападот во областа Отукпо во државата Бенуе, каде беа убиени 11 лица, и една недела по масакрот во соседната држава Плато, каде настрадаа над 50 цивили, пренесува агенцијата Ројтерс.
Според податоците на истражувачката организација „SBM Intelligence“, од 2019 година досега во слични конфликти во регионот животот го загубиле над 500 луѓе, а околу 2,2 милиони биле приморани да ги напуштат своите домови.
Последниот напад се случил во областа Гбагир во државата Бенуе, каде група сточари вчера изутрина убиле петмина земјоделци. Полицијата соопшти дека напаѓачите отвориле оган додека органите на редот се обидувале да ги неутрализираат.
Во друг напад што речиси истовремено се случил во областа Лого, биле убиени уште 12 лица, информира портпаролот на полицијата Севусе Анене.
Судирите меѓу сточари и земјоделци со години го загрозуваат снабдувањето со храна во централниот дел на Нигерија – регион од клучно значење за земјоделството, нагласува Ројтерс.
