Свет

Кина зададе уште еден тежок удар кон Трамп: Потегот на Кина со кој САД би изгубиле милијарди

Кина го стопираше увозот на американски течен природен гас, се сврте кон азиските партнери

Кина во март целосно прекина со увозот на течен природен гас (LNG) од САД, во услови на сè поостри трговски тензии меѓу двете најголеми светски економии. Истовремено, Пекинг го зголеми увозот од блиските партнери во Азија – Австралија, Индонезија и Брунеј.

Според официјалните податоци, САД беа меѓу петте најголеми снабдувачи со LNG на кинескиот пазар во 2024 година, со извезени 4,15 милиони тони гориво во вредност од 2,4 милијарди долари. Меѓутоа, уште во јануари 2025, Кина купи 194,2 илјади тони гас од американските компании, за да веќе во февруари таа бројка падне на 65,8 илјади тони.

Март донесе пресврт – САД не се најдоа ниту меѓу главните испорачувачи на LNG за Кина, што претставува прв целосен прекин на увозот од јуни 2022 година.

Кина го надомести недостигот преку интензивирање на трговијата со азиските земји. Индонезија го зголеми извозот за 1,7 пати, достигнувајќи вредност од 330,7 милиони долари месечно. Австралија бележи раст од 18% со извезени 778,4 милиони долари, а повторно е активен и увозот од Брунеј, вреден 51 милион долари.

Трговска војна со рекордни царини

Овој развој следи по одлуката на американскиот претседател Доналд Трамп од 2 април да воведе „реципрочни“ царини на увозот од странство, со што Кина беше директно погодена со рекордно висока стапка од 54%.

Како последица, трговската војна меѓу САД и Кина доживеа нова ескалација. Царините за кинеските извозници кон САД достигнаа 145%, додека американските снабдувачи се соочуваат со 125% тарифи за влез на кинескиот пазар.

Експерти коментираат дека ваквите стапки претставуваат де факто прекин на трговијата меѓу двете сили, со сериозни импликации врз глобалната економија и енергетскиот пазар.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.