SpaceX, Palantir и Anduril – кандидати за новиот американски противракетен штит „Златна купола“
Компанијата на Илон Маск – SpaceX, во партнерство со Palantir и Anduril, е меѓу водечките кандидати за развој на клучните компоненти на новиот американски противракетен одбранбен систем „Golden Dome“ („Златна купола“), пренесува Reuters повикувајќи се на извори блиски до проектот.
Трите компании понудија иновативно решение базирано на сателитска мрежа за рано откривање и следење ракети, вклучувајќи и орбитална флота со офанзивни способности. Планот предвидува лансирање на 400 до над 1000 сателити, како и дополнителни 200 сателити вооружени со ракети или ласери, иако SpaceX нема директно да учествува во вооружувањето.
Проектот предизвика големо внимание во одбранбениот сектор, а особено контроверзија поради блиската поврзаност на Маск и другите основачи со претседател Доналд Трамп. Маск, според податоците, донирал над 250 милиони долари за кампања на Трамп и моментално има советничка улога во владата, што отвора прашања за можен судир на интереси.
Во Пентагон пристигнале над 180 понуди од различни компании, а целосниот систем би можел да чини стотици милијарди долари. Првата фаза е планирана за 2026, а целосната операционалност до 2030 година.
SpaceX, наводно, предложил владата да не го купува системот, туку да користи модел на претплата – што би овозможило побрза имплементација, но и долгорочна зависност од приватен субјект. Некои официјални лица веќе изразија сомнежи за овој пристап.
Покрај технолошките предизвици, проектот се соочува и со политички отпор. Демократски членови на Конгресот предупредуваат на ризикот кога владини советници истовремено имаат деловен интерес во проекти вредни милијарди. Сенаторката Џин Шахин предложи закон со кој би се забранило доделување државни договори на компании во сопственост на актуелни владини советници.
Иако SpaceX има технички капацитет, некои експерти се сомневаат дали може да испорача целосен систем од кој би зависела националната безбедност. Самиот Маск, по објавата на веста, кратко изјави на мрежата X: „Тоа не е точно“, без дополнителни објаснувања.
