Македонија

Газдата на ,,Пуцко Петрол” Асмир Јахоски нуди 2 милиони евра кауција за да излезе од притвор

Газдата на компанијата ,,Пуцко Петрол” Асмир Јахоски нуди 2 милиони евра кауција за да излезе од притвор, тврдат извори во правосудниот систем упатени во случајот.

Според изворите во четвртокот одбраната на Јахоски кој е син на пратеникот на ДУИ Исмаил Јахоски понудила објекти со вредност од 2 милиони евра во обид судот да дозволи Асмир во предметот вреден над 160 милиони евра да се брани од слобода.

За одлуката формално утре треба да одлучат тројца судии од Кривичниот суд во Скопје кои треба да проценат дали Јахоски чие богатство се проценува на десетици милиони евра, треба да биде пуштен дома.

Тројцата судии треба да дадат соодветна правна анализа дали пет недели откако на Асмир Јахоски му беше даден затворски притвор поради опасност да избега или да влијае на сведоци, сега може да се брани од слобода.

Еден од 13 осомничени за набавка на токсичен мазут за ТЕЦ Неготино Асмир Јахоски, син на пратеникот на ДУИ Исмаил Јахоски, очекува утре да излезе од притвор.

Извори во Јавното обвинителство за организиран криминал и во скопскиот кривичен суд за expres.mk тврдат дека за членови на неговото семејство и во ДУИ ова е завршена работа.

Јахоски операцијата за излегување од притвор ја започнал преку неговите адвокати пред четири дена на ,,Велики четврток” кога до судот било поднесено барање за прекин на притвор и пуштање на слобода.

Иако во други случаи барањето за притвор до обвинителството може да патува со денови во четвртокот тоа експресно стигнало од Основниот кривичен суд Скопје до Основното јавно обвинителство за гонење организиран криминал и корупција, кое го води Ислам Абази.

Абази важи за човек близок на Али Ахмети од ДУИ каде пратеник е таткото на Асмир, Исмаил Јахоски.

Во барањето до судот Асмир Јахоски нудел милиони евра имот како гаранција дека нема да избега за време на судењето.

Преходно на Асмир Јахоски под притисок на јавноста со решение на судија на претходна постапка му се преиначи одлуката и од домашен му беше определен мерка притвор во траење од 30 дена заради постоење на основите од чл. 165. ст.1 т. 1 и 2 односно Опасност од бегство и Околности кои укажуваат дека истиот може да ја попречи истрагата со влијание врз сведоци.

Асмир Јахоски според правосудните извори ќе бил на слобода уште во четвртокот затоа што по позитивното мислење на обвинителството кое го води Ислам Абази судот бил подготвен да го пушти дома но пречка била една институција која не можела во работно време да ги парафира документите со кои обвинетиот ќе ја потврдил гаранцијата во недвижен имот.

Сега изворите тврдат дека откако Абази дал мислење дека Јахоски треба да биде пуштен на слобода Кривичниот суд Скопје утре ќе одлучи за пуштање на синот на пратеникот на ДУИ од затворот во Шутка.

Шефот на Обвинителството за организиран криминал Ислам Абази беше избран за шеф на обвинителството за гонење организиран криминал и корупција во 2022 година. Сомнежите за негова блискост со раководството на ДУИ ги подгреаја фотографиите на Абази со неговиот соселанец Али Ахмети од Зајас, како и со други функционери на ДУИ.

Обвинителството на почетокот на процесот побара притвор за петмина осомничени за спорните набавки на мазут за ТЕЦ Неготино, од кои поранешниот директор на ЕСМ Васко Ковачевски е во бегство.

Од останатите четворица, тројца завршија во Шутка – сопствениците на РКМ Ратко Капушевски и Ерџан Сулкоски, како и поранешниот секторски директор во ЕСМ Ардијан Муча, а Асмир Јахоски, син на пратеникот Исмаил Јахоски од ДУИ доби домашен па потоа затворски притвор.

Истрага за тендерите за набавка на мазут за ТЕЦ Неготино од 2021 до 2023 во вредност од 167 милиони евра беше отворена против 13 лица и една фирма.

Македонија

Со „СМАРТ/МК 2030“, Мицкоски најавува дигитална и транспарентна Македонија

Премиерот Христијан Мицкоски денеска официјално ја промовираше Националната стратегија за развој на информатичко-комуникациските технологии – СМАРТ/МК 2030, нагласувајќи дека документот претставува суштински одговор на реалните општествени предизвици. Според него, стратегијата е јасна и амбициозна патоказна рамка што треба да ја насочи државата кон темелна дигитална трансформација и изградба на современо, технолошки напредно општество.

„Ова не е само уште еден документ. Денес ја демонстрираме нашата политичка волја и решителност да изградиме држава што е ефикасна, транспарентна и во служба на граѓаните“, изјави Мицкоски, нагласувајќи дека дигитализацијата е темел на современото владеење.

Премиерот потенцираше дека дигиталната трансформација не се сведува само на воведување нови технологии, туку подразбира длабока промена во начинот на кој функционираат институциите и како тие комуницираат со граѓаните и бизнис-заедницата.

„Тоа значи побрзи и поедноставни услуги, значително помалку бирократија, поголема отчетност и активно учество на граѓаните во креирањето јавни политики“, порача тој.

Според Мицкоски, Владата ја поставила дигитализацијата меѓу своите врвни приоритети, бидејќи таа е клучна алатка за зајакнување на владеењето на правото и за ефикасна борба против корупцијата.

„Дигиталните процеси оставаат јасна трага. Кога системите се поврзани, нема простор за злоупотреби, селективност или привилегии – одговорноста станува недвосмислена“, истакна премиерот.

Тој додаде дека стратегијата СМАРТ/МК 2030 е целосно усогласена со Националната развојна стратегија 2024–2044 и со европските дигитални политики и стандарди, опфаќајќи клучни области како електронски комуникации, дигитализација на јавните регистри, користење облак-услуги и електронска идентификација.

„Нема силна економија без развиени дигитални вештини, нема модерно општество без дигитално писмени граѓани и нема конкурентна држава без иновативен и моќен ИКТ-сектор“, нагласи Мицкоски.

На крајот од своето обраќање, Мицкоски истакна дека стратегијата не припаѓа на една влада или институција, туку претставува заедничка обврска на државните органи, приватниот сектор, академската заедница и граѓанското општество.

„Ова е наш заеднички пат кон паметна, дигитална и правична Македонија до 2030 година“, заклучи премиерот.

Македонија

Безбедноста на новогодишните пакетчиња проверена – резултатите во АХВ охрабрувачки

Агенцијата за храна и ветеринарство (АХВ) спроведе вонредни инспекции на детските новогодишни пакетчиња и откри само минимални неправилности. Вкупно беа извршени 262 контроли во магацини за пакување, маркети и продавници кои нудат овој вид производи.

Проблеми беа утврдени кај неколку оператори поради несовпаѓање на роковите на збирните декларации со роковите на поединечните производи, како и некомплетни декларации. Во такви случаи, инспекциските служби издале четири решенија за повлекување на пакетчињата од промет, додека двајца оператори добиле решенија за поставување на исправни збирни декларации на производите.

Според АХВ, ситуацијата годинава е значително подобрена во споредба со лани, кога инспекциите открија несоодветно означување на пакетчињата, производи со поминат рок на употреба и краток рок на трајност, како и производи со променети органолептички својства. Оваа година, пак, недоследностите се сведени на минимални и не претставуваат ризик за здравјето на децата.

Агенцијата најавува дека контролите ќе продолжат и во наредниот период, особено пред и по новогодишните празници, со цел да се обезбеди безбедноста на детските пакетчиња.

Македонија

Магла и блокади: Сообраќајот на регионалниот пат Берово–Струмица целосно запрен поради најавен собир

АМСМ известува дека поради појава на магла, видливоста на патните правци Неготино – Градско и Неготино – Демир Капија е намалена на само 50 до 60 метри. Возачите се предупредуваат да возат со зголемено внимание и да ги прилагодат брзината на условите на патот.

Жителите на село Двориште најавија јавен собир на регионалниот пат П-1302 (Берово – Струмица), на местото познато како „Студенец“, утре, на 19.12.2025 година во 10.00 часот. Се очекува патот да биде целосно блокиран, па возачите кои патуваат по правецот Струмица – Берово се советуваат да користат алтернативни патни правци.

На државните патишта се вози непречено, со релативно посуви коловози. Интензитетот на сообраќај надвор од градските средини е умерен. На граничните премини нема подолги задржувања за влез и излез од државата, што овозможува непречено движење за патниците.