Република

Инспекторите повторно на терен во Тетово, се спремаат големи казни

Тетово е пред безбедносна криза – огромен број училишта, градинки, верски објекти и јавни институции не ги исполнуваат основните услови за заштита од пожари! По извршени 24 контроли, Инспекторатот на Општина Тетово откри алармантна состојба: дури 99% од основните и средните училишта немаат соодветна противпожарна опрема.

Од вторник, инспекторите ќе излезат на терен повторно – овој пат за да проверат дали дадените препораки се спроведени. На удар први се училиштата, каде се утврдени фрапантни пропусти. Од Општината најавуваат строги санкции за директорите кои не постапиле по препораките.

„Контролирани се 24 објекти – само неколку исполнуваат минимални услови: училиштата ‘Никола Штејн’ и ‘Беса’, градинката ‘Ринија’, ‘Маариф’ и Универзитетот на Југоисточна Европа. Сите други се во критична состојба. Казните се неизбежни“, изјави портпаролот Албион Алили.

Откритието не застанува тука – верските објекти, џамиите и црквите, како и Универзитетот во Тетово, се целосно небезбедни. Пожарникарите предупредуваат дека мора итно да се реагира за да се спречат трагедии слични на онаа во Кочани.

„На Универзитетот во Тетово, ниту еден апарат за гаснење не функционираше. Слична е ситуацијата и во 19 џамии и 5 цркви. Опремата е со истечен рок, а некаде и целосно отсутна“, предупреди Алили.

Најтежок случај е регистриран во училиштето „Истигбал“, каде учат над илјада ученици, а објектот нема ниту еден хидрант ниту функционирачка противпожарна опрема.

Општинскиот инспекторат ќе биде на терен цела недела, а јавноста бара одговорност и итно делување за да се заштитат учениците и граѓаните од можни катастрофи.

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.