Африканската слоница Папи доби нов дом во бразилската прашума по три децении во аргентински зоолошки
По цели 30 години поминати во зоолошката градина во Буенос Аирес, африканската слоница Папи денеска безбедно пристигна во своето ново засолниште во бразилската прашума, објави градската управа на аргентинската престолнина.
Слоницата, стара 35 години, помина пат од 2.700 километри до државата Мато Гросо во Бразил, каде што беше пречекана во одлична здравствена состојба, пренесе агенцијата AP.
Патувањето до единственото засолниште за слонови во Латинска Америка траело пет дена. По пристигнувањето, Папи не сакала веднаш да го напушти железниот транспортер во кој била пренесена, па чуварите ја намамиле со нејзините омилени деликатеси – шеќерна трска и лубеница.
Преселбата е дел од поширокиот процес на трансформација на некогашните зоолошки во Буенос Аирес, кои од 2016 година се пренаменуваа во еколошки паркови за заштита на биодиверзитетот и зачувување на автохтоните видови.
Во рамки на таа иницијатива, досега се преместени над 1.000 животни – меѓу кои лавови, тигри, мечки и мајмуни – во други држави, каде што имаат подобри услови за живот, пишува Еуроњуз.
