Почина папата Франциско – светот се збогува со гласот на реформите
Папата Франциско, духовниот лидер на повеќе од милијарда католици ширум светот, почина на 89-годишна возраст по компликации од билатерална пневмонија, соопшти Ватикан. Веќе извесно време се бореше со здравствени проблеми и неодамна беше хоспитализиран во болница во Рим, каде што помина подолг период на лекување.
Франциско стана папа во 2013 година, по историската оставка на неговиот претходник, папата Бенедикт XVI. Со своето изборување, Хорхе Марио Бергољо, надбискуп од Буенос Аирес, стана првиот папа од Латинска Америка и првиот језуит на чело на Католичката црква.
Во текот на својот понтификат, папата Франциско остана запаметен како лидер кој иницираше значајни реформи во Ватикан, се залагаше за социјална правда, отворен дијалог со различни заедници и постојано апелираше за мир и милосрдие.
Во последните години неговото здравје беше повод за загриженост меѓу верниците – неколку пати беше хоспитализиран, но и покрај слабоста, тој остана посветен на својата мисија до самиот крај.
Неговото последно појавување во јавноста беше токму на Воскресение, кога од балконот на базиликата Свети Петар го упати традиционалниот благослов Urbi et Orbi. Само еден ден подоцна, црквата и светот останаа без еден од највлијателните гласови на современото христијанство.
Животот и делото на папата Франциско оставија длабока трага – не само во историјата на црквата, туку и во срцата на милиони луѓе ширум светот.
