Кина разви нов вид бомба – термичко оружје што може да стопи метал и уништи електроника
Кинески научници развијa револуционерно ненуклеарно оружје, термичка бомба базирана на водородно гориво, која, според пишувањата на Daily Star, може да предизвика огнена топка со температура од илјада степени Целзиусови и да го стопи речиси секој метал.
Бомбата тежи само два килограми, а по својот ефект често се споредува со напалм. По експлозијата, создава топлинска верижна реакција која трае значително подолго од традиционалните експлозиви базирани на ТНТ – дури 15 пати подолго. Овој ефект, сличен на нуклеарно оружје, овозможува постепено, но темелно уништување на целта.
Развивач на бомбата е Кинеската државна корпорација за бродоградба (CSSC), која е меѓу клучните играчи во развојот на подводно вооружување. Новото оружје е веќе успешно тестирано на терен во контролирани услови.
Тајната состојка: магнезиев хидрид
Како што наведуваат од истражувачкиот тим, клучната компонента на ова оружје е магнезиев хидрид – прашкаста супстанца која складира водород во цврста состојба. До неодамна, неговото производство беше многу ризично и скапо, дури и во минимални количини. Сега, благодарение на нова кинеска технологија, отворена е фабрика со капацитет од 150 тони годишно, при што производството е побезбедно и поевтино.
„Експлозиите на водороден гас се активираат со минимална енергија, имаат широк опсег на експлозивност и ослободуваат пламени кои брзо се шират и покриваат голема површина. Ова овозможува прецизна контрола врз интензитетот и насоката на уништување“, велат научниците.
Новата бомба, според описите, функционира како џиновски горилник – не делува моментално, туку создава долготрен удар кој може да ги стопи металните делови од возила, да изгори беспилотни летала и да создаде услови за таканаречено „одбивање на пристапот“ – односно, да спречи користење на теренот од страна на противникот.
Според CSSC, доколку ова оружје се развие во полн капацитет, Кина ќе воспостави нова класа термичко вооружување кое не само што ќе уништува физичка воена опрема, туку ќе има капацитет и да „испече“ електронски системи и да запали цели зони.
