Светот се збогува со папата Франциск: Пофалби за „народниот папа“ од светските лидери
По објавата за смртта на папата Франциск, бројни светски лидери му оддадоа почит, истакнувајќи ја неговата скромност, милосрдност и посветеност на најранливите.
Италијанскиот министер за надворешни работи, Антонио Тајани, порача дека „папата Франциск се врати во домот на Отецот“, опишувајќи го како голем понтиф кој се грижеше за сите живи суштества.
Претседателката на Европската комисија, Урсула фон дер Лајен, нагласи дека папата инспирираше милиони, дури и надвор од Католичката црква, со својата љубов и посветеност кон најнемоќните.
Францускиот претседател Емануел Макрон истакна дека во време на војни и страдања, папата секогаш беше глас на хуманоста, додека германскиот политичар Фридрих Мерц рече дека ќе остане запаметен по борбата за најзагрозените.
Холандскиот премиер Дик Шоф го нарече „човек од народот“, а претседателот на Израел, Исак Херцог, истакна дека папата посвети живот на мирот и сиромашните, со надеж дека неговите молитви за мир на Блискиот Исток ќе бидат услишани.
Претседателот на Европскиот совет, Антонио Кошта, го пофали папата за неговата посветеност на глобалните предизвици – миграција, климатски промени, нееднаквост и мир.
Претседателката на Европскиот парламент, Роберта Мецола, го опиша како „папа на народот“ кој ќе остане запаметен по својата борба за еднаквост и социјална правда.
Папата Франциск почина во 88-та година од животот, како прв латиноамерикански папа и духовен лидер кој зад себе остава силно наследство на емпатија, социјална свест и едноставност.
