Македонија

Тројца судии утре формално ќе одлучат за притворот на синот на моќниот Јахоски

Изворите претходно предупредија дека иако на Јахоски првичниот домашен против му бил заменет со затворски притвор поради опасност од бегство или да влијае на сведоци тој сега може да добие шанса целосно да се брани од слобода додека трае случајот вреден над 160 милиони евра, пишува expres.mk

Претседателот на скопскиот Кривичен суд Иван Џолев, судијката Софија Ефремова Гаврилова и судијата Илија Трпков се тројцата членови на телото кое утре формално ќе одлучи дали Асмир Јахоски син на пратеникот на ДУИ Исмаил Јахоски ќе се брани од слобода.

Судијата Џолев два пати во време на владата на СДСМ и ДУИ е избран за претседател на судот со најголем број и најтешки случаи. Судијката Ефремова Гаврилова во јавноста е позната по пресудата за Бојан Јовановски од 9 години затвор. На судењето беше одбиено барањето на Боки 13 за сведок да биде повикан Зоран Заев.

Контроверзниот судија Илија Трпков судеше неколку звучни предмети но својот имиџ дефинитвно го наруши откако како судија рече дека имал лично убедување во вината на обвинетите за предметот ,,Организатори на 27 Април” кој пропадна затоа што Кривичниот суд по 6 години судење ги амнестираше сите осомничени.

Со тоа Трпков станал пристрасен во случајот со вратениот од Шведска Дејан Давидовски Дешо кој е дел од случајот 27 Април поради кој доби статус на политички азилант во Стокхолм.

Што се случувало минатата недела?

Откако во четвртокот на успеала ,,Операцијата велики Четврток”, во која обвинителството за организиран криминал што го води блискиот на ДУИ Ислам Абази требало да даде позитивно мислење а судот да го ослободи Јахоски за утре се очекува разврска на случајот.

Неофицијално тројцата судии, според нивни правосудни колеги, ќе одлучуваат за случајот затоа што тие биле единствени судии кои во четвртокот биле на работа во скопскиот суд кога пристигнало барањето за ослободување од притвор за Јахоски.

Како судиите ќе проценат дали завршила опасноста Јахоски да влијае на сведоци што беше причина од домашен притвор на почетокот на Март да замине во Шутка, засега никој не може да претпостави.

Јахоски како гаранција дека нема да избега од земјава додека му се суди за случајот во кој ТЕЦ Неготино купувал токсичен дизел, нуди имот вреден 2 милиони денари.

Тој сега нуди мал дел од неговото богатство за да излезе од затворот во ,,Шутка”.

Целата операција требало да заврши во четвртокот.

Синот на моќниот политичар веќе се гледа на слобода.

Извор: expres.mk

Македонија

Стабилно време со магла до понеделник, дожд од вторник

До понеделник се очекува стабилно и претежно тивко време низ земјава, со појава на магла во утринските часови и зголемена облачност на некои места.

Утре, 18 декември, времето ќе биде променливо облачно со сончеви периоди, додека претпладне на одредени места ќе се појави магла. Ветарот ќе биде слаб и променлив.

Во Скопје се очекува слично време, со претежно тивко време и појава на магла во котлинските делови претпладне.

Стабилното време ќе се задржи до понеделник, а од вторник се најавуваат локални врнежи од дожд.

Македонија

Над 40 државни институции преминаа на електронско управување со документи

Повеќе од 40 институции во државата веќе го користат националниот Документ менаџмент систем (ДМС), што овозможува побрзи и поефикасни услуги за граѓаните, соопшти министерот за дигитална трансформација Стефан Андоновски во изјава за медиумите.

Според него, поврзувањето на институциите и општините преку единствен дигитален систем претставува суштинска реформа во функционирањето на државната администрација, со фокус на поедноставени и подостапни јавни услуги.

Андоновски информираше дека за само четири месеци е двојно зголемен бројот на институции кои користат електронска архива и електронски систем за управување со документи. Дополнително, преку државната платформа за интероперабилност, само во ноември биле реализирани 2,6 милиони трансакции, што претставува значителен раст во однос на просекот во текот на 2024 година.

Министерот посочи и дека за 20 проценти е зголемен бројот на институции и компании приклучени на платформата за интероперабилност, што директно придонесува за намалување на административните процедури и потребата граѓаните да доставуваат документи од една до друга институција.

„Овие резултати значат помалку хартија, помалку чекање и помалку простор за корупција. Дигиталната трансформација не ја третираме како ИТ-проект, туку како реформа во корист на граѓаните, со јасни и фер процедури“, истакна Андоновски.

Тој додаде дека целта е институциите да функционираат брзо, разбирливо и еднакво за сите, а Министерството за дигитална трансформација останува посветено принципот „граѓаните на прво место“ да стане стандард во работењето на државата преку конкретни и мерливи резултати.

Македонија

Собранието ги усвои клучните закони за проектот „Безбеден град“

Собранието во рамки на попладневниот дел на 76. седница без расправа ги донесе измените и дополнувањата на повеќе закони кои се дел од пакетот потребен за целосно функционирање на системот „Безбеден град“. Со 65 гласа „за“ и ниту еден „против“ или „воздржан“, пратениците усвоија измени на Законот за извршување на санкциите, Законот за полиција, Законот за возила и Законот за безбедност на сообраќајот на патиштата, сите по скратена постапка.

Пратеникот Бојан Стојановски од ВМРО-ДПМНЕ истакна дека законот е дел од шесте законски измени кои обезбедуваат имплементација на еден од најзначајните проекти во историјата на Македонија, кој започна пред неколку недели и практично ќе стартува од 1 февруари.

Законот за прекршоци, исто така дел од пакетот, воведува посебна постапка за прекршоци констатирани со технички средства и уреди за снимање, вклучително електронска достава преку текстуални пораки или е-пошта, 50% намалување на глобата при доброволно плаќање во рок од осум дена, како и автоматско суспендирање на возачката дозвола по акумулирање на три забрани во четири години. Пратеничката Моника Трајанова од ВМРО-ДПМНЕ објасни дека измените ќе го зголемат ефектот на превенцијата, ќе намалат административни трошоци и ќе ја зголемат ефикасноста на постапките.

Стојановски додаде дека законите овозможуваат одземање на возило на несовесни возачи, како и подобрување на процесот на издавање возачки дозволи, со зголемена транспарентност и контрола врз членовите на комисијата која ги доделува дозволите.

Во рамки на истата седница, пратениците го усвоија и Законот за концесии и јавно-приватно партнерство, исто така по скратена постапка, со што се овозможува поефикасно реализирање на инфраструктурни и други јавни проекти.