Балкан

Паника во Истанбул: Граѓаните на улица, властите предупредуваат на нови потреси

По серијата земјотреси што го погодија Истанбул утрово, турските власти апелираат до граѓаните да не влегуваат во потенцијално оштетени згради и да користат мобилни телефони само во итни случаи.

Според министерот за внатрешни работи, Алије Јерликаја, тимовите за управување со катастрофи и вонредни состојби веќе започнале со проценка на штетите на терен.

Првите слики што пристигнуваат од Истанбул покажуваат вознемирени граѓани како во паника ги напуштаат зградите и се обидуваат да воспостават контакт со своите најблиски. Силниот земјотрес предизвика страв и евакуации низ целиот град.

Жителите на Истанбул се во шок по земјотресот. Селин Титер, била на работа во деловна зграда на европската страна од градот кога започнал земјотресот, пренесуваат медиумите.

На почетокот според изјавата, почувствувала како земјата се поместува под неа, исфрлајќи ја од рамнотежа. Потоа слушнала длабок татнеж, „како нешто да удираше одоздола“.

„Кога тоа се случи, многумина испаничија. Многумина почнаа да бегаат“, рече таа.

Таа додаде дека многу луѓе во Истанбул се многу претпазливи кога станува збор за земјотреси, особено по катастрофалните земјотреси од 2023 година во Турција и Сирија, кога загинаа 55.000 луѓе.

„Повеќето луѓе што живеат во Истанбул знаат дека се очекува голем земјотрес. Луѓето сега се прашуваат – дали ова беше претпотрес?“

Турската агенција за вонредни ситуации објави дека уште три земјотреси се регистрирани во населбата Бујукчемеџе во западниот дел на Истанбул. Поради огромниот број на пристапи до веб-страницата на агенцијата, системот привремено беше исклучен, а дополнителни информации се очекуваат во наредните часови.

Последователно, официјалната проценка на јачината на земјотресот беше намалена на 4,9 степени според Рихтеровата скала, а епицентарот се наоѓа во Мраморното Море во близина на Истанбул. Претходно беше објавено дека земјотресот бил со јачина од 6,2 степени.

Министерот за транспорт и инфраструктура, Абдулкадир Уралоглу, изјави дека нема пријавени штети на патиштата, железниците, аеродромите и линиите на метрото во Истанбул.

Истанбул, град со повеќе од 16 милиони жители, се наоѓа на Северноанадолскиот расед, познат по својата висока сеизмичка активност. Експертите со децении предупредуваат дека уште еден голем земјотрес е само прашање на време и дека илјадници лошо изградени згради, изградени за време на градежниот бум, се главната причина за потенцијални трагедии.

Медиумите потсетуваат дека Истанбул неколку пати низ историјата бил погоден од разорни земјотреси. Најстрашниот во историјата се случил во 1509 година и е познат како „мала апокалипса“.

Се апелира до граѓаните да бидат максимално внимателни и да ги почитуваат упатствата на надлежните служби.

Балкан

ПАДНА НАЈГОЛЕМИОТ БАЛКАНСКИ НАРКО-КЛАН

Шпанската полиција разби ќелија на балкански нарко-картел во голема меѓународна операција координирана од Европол, во која учествуваа и безбедносните служби од Србија, БиХ и Хрватска. Во акцијата се уапсени 30 лица, а запленети се 2.550 килограми кокаин – една од најголемите државни заплени во Шпанија.

Според шпанските медиуми, операцијата е спроведена во регионот Кампо де Гибралтар, каде што криминалната група ја користела реката Гвадалкивир како главна влезна точка за дрогата. Кокаинот бил префрлан од морето со глисери до повеќе локации долж реката, со што се намалувал ризикот од полициско пресретнување и се олеснувала понатамошната дистрибуција.

Рации биле извршени во Малага, Кадиз и Севиља, при што биле запленети оружје, големи суми пари, компјутери, документација и значителни количини дрога. Истражителите наведуваат дека истрагата продолжува со цел следење на финансиските текови, идентификација на нови ќелии и реконструкција на врските меѓу различните гранки на организацијата. Во акцијата учествувале повеќе од 500 полицајци, а биле претресени 45 куќи и компании.

Шпанските власти соопштија дека меѓу уапсените има и водечки фигури на т.н. балкански картел. Безбедносните служби предупредуваат дека во последните месеци балканските криминални мрежи го прошируваат влијанието и преземаат контрола врз трансконтиненталните кокаински рути, потпирајќи се на директни контакти со производители во Колумбија, Перу и Еквадор и на сложени финансиски шеми за перење пари.

Министерството за внатрешни работи на Србија потврди дека во Шпанија се уапсени српските државјани Б.Б. (62), Б.И. (49), М.Б. (26), М.Н. (28), С.С. (38), Р.М. (21), Д.П. (32) и Н.Т. (32). Според сомнежите, тие обезбедувале логистика и опрема за прием на кокаинот пристигнат од Колумбија, кој потоа бил складиран и дистрибуиран во координација со шпански криминални групи.

Шпанската Национална полиција објави и видео-снимки од претресите, на кои се гледаат дрога, оружје и снопови банкноти, како и обележја поврзани со криминалната мрежа.

Балкан

Албанија ја зајакнува одбраната: пристигнаа првите „Џавелин“ противтенковски системи

Албанија ја опреми својата армија со противтенковскиот ракетен систем „Џавелин“, еден од најнапредните одбранбени системи што ги користат земјите-членки на НАТО. Првата пратка на овие системи веќе е примена, а втората се очекува во текот на 2026 година.

Министерот за одбрана Пиро Венгу истакна дека пристигнувањето на „Џавелин“ претставува значаен чекор во зајакнувањето на одбранбените капацитети на Албанија и зголемувањето на интероперабилноста со НАТО.

„Станува збор за реализација на поранешно барање, кое сега се материјализира со модерна противтенковска опрема од највисоки стандарди. Оваа испорака е дел од планиран процес, додека втората фаза се очекува следната година. Оваа билатерална соработка со САД ја опфаќа и Косово, што е од стратешко значење за регионалната безбедност“, рече Венгу.

Системот „Џавелин“ е клучен елемент за копнената одбрана, со висока ефикасност против оклопни возила и широкоприфатен во армиите на НАТО. Неговата набавка е реализирана преку програмата за продажба на странски воени оружја на САД, што ја потврдува тесната соработка помеѓу двете земји.

Овој потег значително ја зголемува способноста на албанските копнени сили да одговорат на модерни закани и да дејствуваат во согласност со стандардите на Алијансата.

Балкан

Бугарија нуди мазут како спас за Македонија во време на енергетска криза

Во услови на вонредна состојба во Македонија, предизвикана од блокадата на граничните премини со Грција од страна на грчките земјоделци, Бугарија понуди итна помош со испорака на мазут. Оваа понуда беше изнесена во телефонски разговор меѓу бугарскиот министер за надворешни работи, Георг Георгиев, и неговиот македонски колега, Тимчо Муцунски.

Според бугарската влада, инспекција спроведена од министерот за енергетика Жечо Станков покажа дека во земјата има доволно мазут за домашните потреби. Со оглед на тоа, Софија е подготвена да обезбеди дополнителни количини за Македонија, во согласност со техничките и логистичките можности.

Од бугарска страна се истакнува дека понудената помош е „израз на добрососедство и солидарност“ и има за цел да ја зачува енергетската стабилност во регионот.

Засега, македонските власти не ја коментирале официјално понудата на Софија.